Azərbaycan, Bakı, 30 avqust /Trend, müxbir H.Vəliyev/
Xəzər dənizinin statusu məsələləsinin həll edilməməsi Trans-Asiya-Avropa optik-lif kabel magisralının Xəzər seqmentinin çəkilişi layihəsinə mane olur. Bu barədə bazar ertəsi Qazaxıstanın Azərbaycandakı səfiri Serik Primbetov deyib.
Səfirin sözlərinə görə, hazırda bu layihə ilə bağlı razılıq var ki, buna da iki ölkənin nazirlikləri səviyyəsində baxılır.
Xəzərin statusunun müəyyənləşməsi suyun dibi ilə kabel magistralının çəkilməsi üçün optimal marşrutu seçməyə imkan verəcək.
Azərbaycan Rabitə və İnformasiya Texnologiyaları Nazirliyinin Beynəlxalq Əlaqələr və Hesablamalar Mərkəzi və Qazaxıstanın "KazTransCom" şirkəti arasında imzalanan protokola əsasən, layihənin maliyyələşməsi birlikdə həyata keçiriləcək.
Bundan əvvəl nazirliyin Beynəlxalq Əlaqələr və Hesablamalar Mərkəzinin direktoru Cəlil Cəfərovun dediyinə görə, Qazaxıstanla Trans-Asiya-Avropa kabel magistralının çəkilməsi məsələsinin aktuallığını itirməsinə baxmayaraq, Azərbaycan tərəfi hələ də bu məsələnin tezliklə həllində maraqlıdır.
Cəfərovun sözlərinə görə, Türkmənistan da Trans-Asiya-Avropa kabel magistralının çəkilməsi məsələsinə maraq göstərir. Bu marşrut daha sərfəlidir, belə ki, məsafəni azaltmağa imkan verir, mübadilə edilən trafikin həcmini artırır və Qırğızstan və Çinə birbaşa çıxışı var. Türkmənistan tərəfi də bu layihəyə hələ ki ehtiyatla yanaşır, belə ki, Xəzərin statusu məsələsi hələ də həll edilməyib.
Azərbaycan rabitə və informasiya texnologiyaları naziri Əli Abbasov hesab edir ki, Birləşmiş Millətlər Təşkilatının Azərbaycanın "Şərq-Qərb" supermagistralının yaradılması üzrə qəbul etdiyi qətnamə optik-lif magistralının Xəzər seqmentinin çəkilişi məsələsinin bütün təşkilati məsələlərini aradan qaldıracaq. Siyasi qətnaməyə əsasən, bütün regional ölkələrə bu layihənin həyata keçirilməsi üçün lazımi addımların atılması tövsiyə edilib və Xəzər seqmentinin çəkilişi layihəsi Azərbaycanın təşəbbüsü çərçivəsində həyata keçiriləcək.
Primbetovun sözlərinə görə, Qazaxıstan "Şərq-Qərb" informasiya supermagistralının yaradılması üzrə Azərbaycanın təşəbbüsünü tam dəstəkləyir və bu layihədə iştirak etməyə hazırdır.
