Azərbaycan, Bakı, 23 dekabr /Trend, müxbir H.Vəliyev/
"Yumroo" şirkəti "Yumroo" axtarış sisteminin optimallaşdırılması üzrə iş aparır. Bu barədə Trend-ə cümə axşamı "Yumroo"nun icraçı direktoru Hikmət Hüseynov məlumat verib.
Hüseynovun sözlərinə görə, istifadəçilərin sorğularının vacibliyinə görə saytların daha dəqiq düzülməsi və Azərbaycan dilinin morfologiyası üzrə axtarış sisteminin dəqiq işləməsi üçün şirkət mütəxəssisləri tərəfindən uğursuz alqoritmlər kənarlaşdırılıb.
"Bu gün 2011-ci il üçün başlıca vəzifəmiz server avadanlıqlarının gücünün artırılmasından ibarətdir ki, bu da məlumatın işlənməsi keyfiyyətini yaxşılaşdırmağa və lazımi məlumatın axtarış vaxtını azaltmağa imkan verəcək", - Hüseynov deyib.
Bu gün "Yumroo" axtarış sistemi 1,6 milyon səhifəni indeksləşdirməyə imkan verir. Azərbaycan dilində axtarışın detallaşdırılmasına gəldikdə, bu zaman milli sistem heç nədə "Google"dan geri qalmır. "Yumroo"nun əsas üstünlüyü ondan ibarətdir ki, sistemin axtarış mühərriki daha çox Azərbaycan dilinə istiqamətlənib. Sistemin proqram hissəsi şirkət tərəfindən işlənib hazırlanıb.
