Azərbaycan, Bakı, 8 fevral /Trend, müxbir H.Vəliyev/
Azərbaycan Milli Elmlər Akademiyasının (AMEA) Texnologiyalar İnstitutu kompüter insidentlərinə AZ-CERT reaksiya komandasının Transavropa Elmi-Tədqiqat və Təhsil Şəbəkəsi Assosiasiyasında (Trans-European Research and Education Networking Association - TERENA) akkreditasiyası üzrə işlər aparır. Bu barədə çərşənbə axşamı institutun direktoru Rasim Əliquliyev deyib.
Onun sözlərinə görə, AZ-CERT informasiya təhlükəsizliyinin komponentlərindən biri olmaqla, "AzScienceNet" elmi kompüter şəbəkəsinin bazasında yaradılıb.
"Bu layihə çərçivəsində bu gün artıq İnternet mühitində anomal təzahürlərin və fövqəladə halların monitorinqi aparılır, virusların vaxtında aşkar edilməsi və digər tədbirlər həyata keçirilir. Bu, internet şəbəkəsinin bilavasitə təhlükəsizliyinə və keyfiyyətinə təsir göstərir", - Əliquliyev qeyd edib.
Onun sözlərinə görə, reaksiya qrupunu yaratmaqla institut bir sıra texnoloji və təşkilati tədbirlər keçirmək barədə üzərinə öhdəlik götürüb. "AzScienceNet" elmi kompüter şəbəkəsi üçün artıq Elmlər Akademiyası tərəfindən qəbul edilən İnternetdən istifadə siyasəti işlənib hazırlanıb. Təhlükəsizlik siyasətinin hazırlanması üzrə işlər aparılır, İnternet mühitində etik normalara əməl olunmanı, təhdid və təhlükə imkanlarının məhdudlaşdırmasını nəzərdə tutan hüquqi sənədlərin qəbul edilməsi planlaşdırılır.
Perspektivdə AZ-CERT-in fəaliyyəti operativ reaksiya və informasiya təhlükəsizliyi ilə əlaqədar insidentlər haqqında informasiyanın yığılması ilə məhdudlaşdırılmayacaq. O, elmi-analitik tədqiqatların aparılmasını və bu sahədə beynəlxalq qurumlarla əməkdaşlığı nəzərdə tutacaq.
Azərbaycanda belə strukturun formalaşdırılması üzrə işlər "Kibercinayətkarlıq haqqında" Konvensiyanın müddəalarına əsasən aparılır.
Hazırda "AzScienceNet" şəbəkəsinə iki mindən artıq kompüter qoşulub. İstifadəçilərin sayı 10 minə çatır. Buraxılış gücü 71 Mbit/saniyə olan AzScienceNet-in rabitə kanalı ilkin provayder Delta Telecom-dan icarəyə götürülüb.
Operativ nəzarətin təmini və informasiya təhlükəsizliyinin səviyyəsinin artırılması üçün layihə çərçivəsində şəbəkə monitorinqi və informasiya təhlükəsizliyi xidməti yaradılıb.
"AzScienceNet" şəbəkəsi mərkəzləşdirilmiş antispam və antivirus servisləri ilə müdafiə olunur. Bu gün "AzScienceNet"in infrastrukturunun genişlənməsi, DATA-mərkəzin yaradılması, GRID, Cloud Computing və Eduroam (Education Roaming) servislərinin tətbiqi, videokonfrans sisteminin təşkili, beynəlxalq səviyyədə və digər ölkələrdə fəaliyyət göstərən müvafiq elmi şəbəkə qurumları ilə inteqrasiya istiqamətində kompleks işlər həyata keçirilir.
İTİ tərəfindən "AzScienceNet"in şəbəkə infrastrukturunun formalaşdırılması üzrə konseptual analiz işlənib hazırlanıb və plana uyğun olaraq, 2012-ci ilədək şəbəkə infrastruktutu, maddi-texniki baza və internet şəbəkəsinə çıxışı olan elmi müəssisələrin daxili koprorativ infrastrukturu yaradılacaq.
