Azərbaycan, Bakı, 7 mart /Trend, müxbir H.Vəliyev/
Təhlükəsizliyin təmini, məlumatların saxlanılması və sistem idarəetməsi üçün həllər sahəsində dünya lideri olan "Symantec" Azərbaycanın İT şirkəti AZEL-i Orta Asiya və Cənubi Qafqaz regionunda ən təcrübəli tərəfdaşı elan edib. Bu barədə bazar ertəsi AZEL şirkətinin məlumatında deyilir.
AZEL şirkəti ötən ayın axırlarında Qazaxıstanda keçirilən tərəfdaşlıq sammiti çərçivəsində "Symantec"in təcrübəli tərəfdaşı elan edilib. Orada ən yaxşı tərəfdaş şirkətlər 2010-2011-ci maliyyə ilinin yekunları üzrə mükafatlandırılıblar.
2010-cu ildə AZEL Azərbaycanda "Symantec Gold Partner" statusunu alan ilk şirkət olub. "Symantec Gold Partner" statusu "Symantec"in avtomatlaşdırılma və İT infrastukturun idarə edilməsi, təhdidlərin qarşısının alınması sahəsində həllərinin irəliləməsində ixtisaslaşan, ştatında bu istiqamətlər üzrə yüksəkixtisaslı, sertifikatlaşdırılmış mütəxəssisləri olan və "Symantec"in məhsullarının müvafiq səviyyəsini təmin edən tərəfdaşlara verilir.
Hazırda AZEL şirkəti tərəfindən Azərbaycanın mobil rabitə operatoru Azercell Telekom-un şəbəkəsində Symantec Security Information Manager (SSIM) sisteminin tətbiqi üzrə layihə həyata keçirilib. SSIM informasiya təhlükəsizliyi sistemi daha vacib biznes əlavələrə qarşı yönələn təhlükəsizlik təhdidlərini aşkar etmək, onların prioritetlərini müəyyənləşdirmək, təhlil etmək və onları aradan qaldırmaq qabiliyyətinə malikdir.
