Azərbaycan, Bakı, 13 aprel /Trend, müxbir H.Vəliyev/
Azərbaycan Milli Elmlər Akademiyasının Fizika İnstitutu ölkənin təhsil sektorunda EduGrid layihəsinin həyata keçirilməsinə başlamağı planlaşdırır. Bu barədə Trend-ə institutun yüksək enerji fizikası laboratoriyasının müdiri Övsət Abdinov məlumat verib.
Abdinovun sözlərinə görə, növbəti həftədən etibarən institut ölkənin orta və ali məktəblərilə Grid-texnologiyaların tətbiqi mövzusunda danışıqlara başlamağı planlaşdırır.
"Grid-seqmentinə çıxış əldə edən məktəblər institutumuzun şəbəkəsi vasitəsilə onlayn rejimdə dünyada istənilən pedaqoqla ünsiyyət qura, canlı mühazirələr, videokonfranslar və s. təşkil edə biləcəklər. Biz ilk növbədə Grid-seqmenti Zərifə Əliyeva adına məktəbdə tətbiq etməyi nəzərdə tutmuşuq", - Abdinov deyib.
Grid-seqment özündə bu resurslardan birləşdirilmiş istifadə imkanlarına malik yüksəksürətli kompüter şəbəkəsini ehtiva edir. Təhsil seqmentində Grid-in mövcudluğu təhsil sistemində məsafədən ünsiyyət üçün yeni imkanlar açır. Çoxsaylı ekranlarda bu prosesin çoxlu iştirakçıları təqdim oluna, eksperimentlər aparıla və modelləşdirmənin nəticələri nümayiş oluna bilər.