Azərbaycan, Bakı, 5 oktyabr /Trend, müxbir H.Vəliyev/
Türkiyənin Boğaziçi Universitetinin azərbaycanlı tələbələri smartfonlar üçün AzərDict lüğəti hazırlayıblar. Trend-in məlumatına görə, bu barədə layihənin iştirakçısı Elşən Həsənov məlumat verib.
Həsənov proqramı hazırlayan on nəfərdən biridir. Proqram sözləri ingilis və rus dillərindən Azərbaycan dilinə və əksinə tərcümə edir.
"Bu gün proqramın 150 min sözdən ibarət lüğət bazası daim yeni terminlərlə doldurulur", - Həsənov deyib.
Apple iOS və Android mühitində tam fəaliyyət göstərən proqram App Store, iTunes Store və Android market online-mağazalarında pulsuz yüklənmə üçün yararlıdır.
Yaxın vaxtlarda istehsalçılar BlackBerry və Nokia smartfonları üçün AzerDict proqramının təqdim etməyi planlaşdırırlar.