Azərbaycan, Bakı, 13 dekabr /Trend, müxbir H.Vəliyev/
Azərbaycanın səhiyyə sistemində prediktiv analiz sistemi tətbiq edilə bilər. Bunu cümə günü Trend-ə IBM şirkətinin Azərbaycanda biznesin inkişafı üzrə mütəxəssisi İsmayıl Əliyev deyib.
Onun sözlərinə görə, söhbət "IBM Watson" super kompüterindən gedir. Kompüter tibbi diaqnostikanı həyata keçirməyə imkan verir.
İ.Əliyev qeyd edib ki, "IBM Watson" ABŞ-ın bir sıra klinikalarında diaqnostik assistent qismində uğurla tətbiq edilir: "Super kompüterin hesablama gücü bir neçə saniyə ərzində tibbi sənədlərdən ibarət 1,5 milyon xəstəlik tarixçəsinin, həmçinin pasiyentlərin sorğusunun nəticələrinin analizini həyata keçirməyə imkan yaradır. Bu məlumatlarda onkoloji xəstəliklərin 10 illik terapiyasının təcrübəsi əks olunub və super kompüter həkimə xəstəliyin müalicəsi üzrə elmi əsaslanmış tövsiyələr təqdim edə bilər".
"IBM Watson" təkcə diaqnoz qoymaq qabiliyyətinə malik deyil, həm də ən optimal müalicə kursunu təyin etmək iqtidarındadır.
Şirkətin bu kompüteri bir çox sahələrdə faydalı ola bilər, çünki xeyli miqdarda məlumatı işləmək və bu məlumatla nə etmək barədə qərar qəbul etmək qabiliyyətinə malikdir.
