Azərbaycan, Bakı, 17 fevral /Trend, müxbir H.Vəliyev/
Azərbaycanın yaşayış məntəqələrində televiziya və radiostansiyaların elektromaqnit səviyyəsi müəyyən edilmiş normaları üstələmir. Bunu Trend-ə Rabitə və İnformasiya Texnologiyaları Nazirliyinin Dövlət Radiotezliklər İdarəsindən (DRİ) bildiriblər.
DRİ-nin Radiomonitorinq şöbəsinin mütəxəssisləri Bakı teleqülləsindən teleradio verilişlərinin yayım keyfiyyəti və siqnalın elektromaqnit təsirinin səviyyəsinin ölçülməsi üzrə sınaq işləri və təhlillər aparıblar.
2013-cü ilin yekunları üzrə teleyayım sahəsində 172 məntəqədə 1638 ölçmə işləri, radioyayım sahəsində isə 137 məntəqədə 1446 ölçmə işləri aparılıb.
26 rayon və şəhər ərazisində qonşu ölkələrdən yayımlanan radio və televiziya verilişlərinin siqnallarının elektromaqnit sahəsinin gərginliyinin səviyyəsi üzrə monitorinqlər aparılıb, həmçinin respublika üzrə DVB-T rəqəmsal televiziya standartı siqnalının əhatə dairəsi ölçülüb.
Ötən ilin sonunda tezlik resurslarından istifadə üzrə nəzarətin gücləndirilməsi məqsədi ilə DRİ Bakının Mehdiabad və Yeni Günəşli qəsəbələrində 2 Mərkəzləşdirilmiş Avtomatlaşdırılmış Radiomonitorinq Şəbəkəsini (MARŞ) işə salıb.
Bakı və Abşeron yarımadası ərazisində işə salınmış məntəqələrin sayı 5-dir (Mehdiabad qəsəbəsi, Sahil qəsəbəsi, "8-ci kilometr" yaşayış massivi və Yasamal rayonu).
Sahil qəsəbəsində yerləşən MARŞ məntəqəsi üçün stasionar avadanlıq apreldə istismara veriləcək və MARŞ idarəetmə mərkəzi ilə inteqrasiya olunacaq. Avadanlığın tədarükçüsü qismində ABŞ-ın "TCI International" şirkəti çıxış edir.
Hazırda Masallı rayonunda yeni MARŞ stansiyasının tikintisi üzrə işlər aparılır.