Azərbaycan, Bakı, 31 may /Trend, müxbir H.Vəliyev/
Azərbaycanın informasiya-kommunikasiya texnologiyaları bazarını yaxın 3 il ərzində sürətli artım gözləyir. Bunu şənbə günü Trend-ə Türkiyənin "Etohum" startap-inkubatorunun qurucusu Burak Böyükdəmir deyib.
Onun sözlərinə görə, elektron kommersiyada və elektron ticarətlə (yeni bank əlavələri, ödəniş sistemləri və s.) bağlı sahələrdə xeyli artım müşahidə olunacaq. Mobil və xüsusilə oyun əlavələri sahəsində də əhəmiyyətli artım gözlənilir.
B.Böyükdəmir qeyd edib ki, şübhəsiz, bu sahədə dövlətin diqqəti çox önəmlidir: "Yüksək Texnologiyalar Parkının tikintisi buna nümunə ola bilər. Zəruri şərait olarsa, Azərbaycanda "Twitter", "WhatsUp", "Facebook" və s. kimi iri layihələr yarana bilər. Demək olar ki, bu növ layihələr artıq reallaşdırılır. Məsələn, bu gün Azərbaycan layihəsi "Silikon vadisi"ndə 5 milyon dollar həcmində maliyyə yardımı alıb. Dəfələrlə Azərbaycanda olmuşam. Birmənalı olaraq deyə bilərəm ki, ölkədə İT-sahibkarlığa böyük maraq var və bu tendensiya ildən-ilə artır".
Onun sözlərinə görə, Azərbaycan Mərkəzi Asiya regionunda texnoloji qovşaq roluna iddia edir və bu regionda keçiriləcək növbəti tədbirlərin "Startup Azerbaijan" və ya "Startup Eurasia" kimi böyük adlar alacağı istisna olunmur.
