Azərbaycanın regionlarında efirə radionəzarət məntəqələri istismara verilib. Dövlət Radio Tezlikləri İdarəsinin radiotezliklər şöbəsinin müdiri Adil Məhsimovun Trend ə bildirdiyi kimi, bu günlərdə Əli-Bayramlı və Qubada 2 obyekt istismara verilib.
Onun sözlərinə görə, hazırda paytaxtın Sahil qəsəbəsində belə məntəqənin tikinti işləri başa çatır və obyekt yaxın vaxtlarda istismara veriləcək.
"Məntəqədə quraşdırılmış bütün avadanlıqlar Yaponiyanın AOR şirkətindən alınıb", - deyə Ə.Məhsimov qeyd edib.
Hazırda məntəqələrə yeni işçilərin tərkibi təsdiqlənib və onlar üçün müvafiq treninqlər keçirilib.
Bu məntəqələrin əsas vəzifələri regionlarda teleradio efirin texniki təchizatına nəzarət və dövrü olaraq DRİ-ni idarənin cari vəziyyəti barədə məlumatlandırmaqdan ibarətdir.
Bakı, Əli-Bayramlı və Qubada efirə radionəzarət məntəqələrinin tikintisi üzrə işlər Azərbaycan Respublikasının Rabitə və İnformasiya Texnologiyaları Nazirliyinin 2005-ci il üçün tədbirlər planında nəzərdə tutulub.