Azərbaycan Rabitə və İnformasiya Texnologiyaları Nazirliyi ilin sonuna kimi ölkədə İKT-nin inkişafı üzrə azad iqtisadi zonaların yaradılması layihəsinin tətbiqinə başlamağı planlaşdırır. Trend in xəbər verdiyi kimi, bu barədə bu gün Rabitə Nazirliyinin baş məsləhətçisi, "Global Resources" şirkətinin təmsilçisi Diana Landau məlumat verib.
Onun sözlərinə görə, layihə kiçik və orta innovasiya sahibkarlığının inkişafı məqsədi ilə texnoparkların yaradılmasını, elektrik avadanlıqları və proqram məhsullarının istehsalı və ixracı üzrə regional bazanın yaradılmasını, ölkənin səmərəli tranzit informasiya məkanına (Data Centre) çevrilməsi, formalaşan informasiya cəmiyyəti üçün insan resurslarının hazırlanması və inkişafını nəzərdə tutur.
Layihənin işlənilməsinin ayrı-ayrı elementləri məsələsinə toxunaraq, D. Landau bildirib ki, digər sahələrdə, məsələn, səhiyyə, kənd təsərrüfatı sahələrində də İKT-nin tətbiqi nəzərdə tutulub. "Xüsusi iqtisadi zonalar həm dövlət strukturları, həm də özəl şirkətlər tərəfindən yaradılmalıdır" - deyə o bildirib. Bu günə qədər bu cür zonaların yaradılması üçün ərazi aeroport yaxınlığında və ya digər bölgələrdə nəzərdən keçirilib.
"Bu, coğrafi sərhədlərlə müəyyən olunmur", - deyə o, qeyd edib.
Qarşıdakı 2 ay ərzində layihənin büdcəsi dəqiqləşdiriləcək, tədarükçülər, potensial tərəfdaşlar və beynəlxalq təşkilatlarla danışıqlar davam etdiriləcək.
Dekabrda tədarükçülərlə sazişin imzalanması planlaşdırılıb. Layihə üzrə tədbirlər planına daxil olan işlərin həyata keçirilməsini sürətləndirmək məqsədi ilə paralel olaraq iki kollektiv çalışacaq. İlin sonuna kimi tikinti işləri üzrə tender elan olunacaq.
