Azərbaycanın mobil operatoru -Bakcell şirkəti 1900 MHs tezlikdə işləyən Latın Amerika operatoru CTİ Mobil ilə rouminq sazişi imzalayıb. Bu şirkət öz xidmətləri ilə Uruqvay ərazisini təmin edir. Bu barədə Trend Bakcell şirkətinin məlumatına istinadən xəbər verir.
Beləliklə, Bakcell şirkətinin rouminq xidməti ilə əhatə olunmuş ölkələrin sayı 125-ə çatıb. Bu ölkələrin operatorları ilə bağlanmış rouminq sazişlərinin ümumi sayı 222-dir.
Son dəfə şirkət analoji sazişi iyul ayında Vyetnamın VMS mobil şirkəti ilə imzalayıb. Bakcell abunəçiləri həmçinin Hutchison 3G (İtaliya), CTI Movil (Paraqvay, GSM 900 MHs), MobileOne (Sinqapur,
900-1800 MHs), IMS (Vyetnam, 900-1800 MHs) və Mobitel (Şri-Lanka, 1800 MHs) kimi mobil şirkətlərin də şəbəkələrində rouminq xidmətindən istifadə etmək imkanına malikdirlər.
Beləliklə, Bakcell şirkətinin İtaliyada rouminq tərəfdaşlarının sayı dördə, Paraqvay, Sinqapur və Şri-Lankada isə ikiyə çatıb.
