2007-ci ildə Azərbaycanda IT nəşrlərin elektron kitabxanasının yaradılacağı ehtimal olunur. Bu istiqamətdə işlər Azərbaycanın rabitə və informasiya texnologiyaları naziri Əli Abbasovun təşəbbüsü ilə nazirliyin mütəxəssisləri tərəfindən Azərbaycan Milli Elmlər Akademiyasının İnformasiya Texnologiyaları İnstitutunun (AMEA İTİ) əməkdaşları ilə birgə həyata keçirilir.
AMEA İTİ -nin direktoru Rasim Əliquliyevin Trend ə verdiyi xəbərə görə, sistemin layihəsi hazırlanıb, onun platforması müəyyən olunub, əvvəl institutun mütəxəssisləri bu cür sistemin, onun Azərbaycan dilinə uyğunlaşdırılması imkanlarını öyrənmək məqsədilə Rusiyada olublar.
Elektron kitabxanaya indiyədək informasiya texnologiyaları mövzusunda həm yerli, həm də xarici müəlliflərin dərc olunmuş bütün kitablarının yerləşdirilməsi planlaşdırılır.
R.Əliquliyev bildirib ki, "kitabxana web texnologiyalar əsasında on-line rejimində fəaliyyət göstərəcək. Burada yalnız kitablar deyil, həm də müxtəlif jurnalların elektron versiyaları yerləşdiriləcək. Kitabxana nazirliyin bazasında deyil, korporativ şəbəkə şəraitində yerləşəcək. İKT sahəsində ixtisaslaşan müəllim və tələbələr, bu sahənin mütəxəssisləri bura daxil ola biləcəklər".
"Hələ ki, onun iş prinsipləri dəqiq şəkildə müəyyən olunmayıb. Gələcəkdə kitabxananın zənginləşdirilməsi üçün yeni nəşrlərin əldə olunması məqsədilə ən böyük nəşriyyat evləri ilə əməkdaşlığın yaradılması ilə bağlı fikirlər var. Ehtimal olunur ki, kitabxanadan istifadə pulsuz, əldə olan imkanlar çərçivəsində olacaq", - deyə institutun direktoru bildirib.
Kitabxananın yaradılması üzrə işlərin 2007-ci ilin ortalarında başa çatması planlaşdırılır.
"Layihə İKT sahəsində bilik səviyyəsinin artırılmasına, bu sahədə yüksəkixtisaslı kadrların hazırlanması üçün yardıma yönəldilib", - deyə R.Əliquliyev bildirib.