Azərbaycan, Bakı /müx. Trend S.Babayeva / Avrasiyanın aparıcı telekommunikasiya şirkətlərindən olan Fintur Holdings Azərbaycan, Gürcüstan, Qazaxıstan və Moldovanın mobil rabitə bazarına 1,5 milyard dollardan çox investisiya yatırıb. Bu barədə Türkiyə, Xəzər və Qara dəniz regionları, Orta Asiya və Rusiyanın telekommukasiya və İT-texnologiyaları üzrə altıncı regional konfransında (Caspian Telecoms 2007) Fintur Holdings şirkətinin baş icraçı direktoru Serkan Elden məlumat verib.
Onun sözlərinə görə, investisiyaların ümumi həcmindən 527 milyon dollar "Azərcell" timsalında Azərbaycanın, 196 milyon dollar "Geocell" timsalında Gürcüstanın, 699 milyon dollar "K`cell" timsalında Qazaxıstanın və 82 milyon dollar "Moldcell" timsalında Moldovanın payına düşür.
Ötən ilin sonunda sözügedən mobil operatorları abonentlərinin ümumi sayı 7.4 milyon nəfər təşkil edib. Onlardan 2,3 milyonu "Azərcell"in payına düşür.
Məlumat üçün bildirək ki, Fintur Holdings "Turkcell" və "TeliaSonera" şirkətlərinin birgə müəssisəsidir. "TeliaSonera"ya Fintur Holdings-ın aksiyalarının 58,55 faizi, "Turkcell"ə isə aksiyaların 41,45 faizi məxsusdur.
