Azərbaycan,Bakı/müxbir Trend S.Babayeva/"Microsoft" korporasiyasının baş vitse-prezidenti və texniki direktoru Kreyq Mandi Bakıya birgünlük səfər edəcək.
Korporasiyanın Azərbaycandakı nümayəndəliyindən çərşənbə axşamı məlumat verildiyi kimi, iyunun 7-də baş tutacaq səfər çərçivəsində ölkədə informasiya-kommunikasiya texnologiyalarının cari vəziyyəti və gələcək əməkdaşlığın mümkün perspektivlərinin müzakirəsi üçün Rabitə və İnformasiya Texnologiyaları Nazirliyinin rəhbərliyi ilə görüş planlaşdırılıb. Həmçinin Azərbaycanın özəl IT şirkətləri ilə görüş də nəzərdə tutulur.
Mandi bilavasitə şirkətin rəhbəri Bill Geytsə tabedir, texnologiyalar, biznes və siyasət sahəsində "Microsoft" korporasiyasının əhatəli strateji planlarını birgə hazırlayırlar. Onun vəzifəsinə bu planların korporasiya daxilində məhsul hazırlayan müxtəlif qruplar arasında koordinasiya edilməsi daxildir.
Mandi internet üçün platforma arxitekturası, Microsoft.NET təşəbbüsünün inkişafı, IT-infrastrukturları, həmçinin intellektual mülkiyyət və mühafizəli informasiya sistemləri (Trustworthy Computing) ilə əlaqədar olan texniki və siyasi problemlərlə məşğul olur.
Kreyq Mandi 1992-ci ildən etibarən "Microsoft" korporasiyasında çalışır.
