Azərbaycan, Bakı, 24 aprel /Trend, müxbir A.Axundov/
Azərbaycan Beynəlxalq Bankı (ABB) özünün və törəmə strukturlarının birləşdirilmiş maliyyə hesabatlarının auditini aparmaq üçün kənar auditin seçilməsi ilə bağlı açıq tender elan edib.
Trend-in məlumatına görə, bu barədə çərşənbə axşamı tender komissiyasının rəsmi mətbuatda dərc edilən məlumatında deyilir.
İlin birinci yarısında və ümumilikdə 2012-ci il ərzində ABB və onun törəmə strukturlarının ("Azərbaycan Beynəlxalq Bankı-Moskva" MMC, "Azərbaycan Beynəlxalq Bankı-Gürcüstan" SC, "Beynəlxalq Sığorta Şirkəti" ASC, "Azərikard" MMC) hesabatlarının auditi beynəlxalq maliyyə hesabatlılığı standartları və beynəlxalq audit standartlarına uyğun aparılmalıdır.
İştirak haqqı min manat olan tenderin şərtlərinə əsasən, 2012-ci ilin birinci yarısı ərzində hesabatların auditinin nəticələri cari ilin oktyabr ayının 1-dən, ümimilikdə 2012-ci il ərzindəki nəticələr isə 2013-cü ilin may ayının 1-dən gec təqdim edilməməlidir.
Tender təklifləri 2012-ci il 11 iyun, saat 18:00-dək qəbul edilir.