Azərbaycan, Bakı,18 avqust / Trend , müxbir T.Cəfərov, R.Hafizoğlu/ İranın islam amilindən istifadə edərək ərəb ölkələri ilə dialoqa başlaması müsəlman birliyinin yaradılması ilə yanaşı, Tehranın regionda öz mövqelərini möhkəmləndirməsi və müttəfiq toplamasına da şərait yaradacaq.
"İran-ərəb dialoqunun baş tutması ilk növbədə müsəlmanların birliyi üçün lazımdır", - deyə iranlı politoloq Bəhram Əmirəhmədian bazar ertəsi Trend - a bildirib.
İranın İSNA agentliyinin məlumatına əsasən, bu ölkənin xarici işlər naziri Mənuçöhr Müttəki avqust ayının 13-də İranın xaricdə işləyən mədəniyyət işçiləri ilə görüşündə bildirib ki, İran ərəb ölkələri ilə yaxın münasibətdə olmaq niyyətindədir. O bildirib ki, İran ərəb birliyində "İran və ərəb dünyası" dialoqunun keçirilməsinə dair təkliflə çıxış edib.
Tehran 1980-ci ildə İran-İraq müharibəsi zamanı ərəblərlə korlanmış qonşuluq münasibətlərini bərpa etməklə yanaşı, islam amilindən istifadə etməklə regionda güclənməyə çalışır.
"Qərb hazırda çalışır ki, İran və ərəb ölkələri, ümumilikdə müsəlman ölkələri arasında ixtilaf yaratsın və bu dialoqun baş tutmaması ən çox Qərbin maraqlarına xidmət edir", - deyə Əmirəhmədian Tehrandan telefonla bildirib.
İraqlı müstəqil politoloq Salih Kəəbi isə hesab edir ki, Tehranın ərəb ölkələri ilə dialoqa başlamasının əsas səbəbi regionda ehtimal edilən ABŞ-İran müharibəsi ilə bağlıdır.
"İran ərəb ölkələri ilə dialoqa başlamaqla özünə müttəfiq qazanmaq niyyətindədir", - deyə Kəəbi bazar ertəsi Bağdaddan Trend -a bildirib.
Kəəbi hesab edir ki, İran regionda güc və söz sahibi olduğuna görə ərəb ölkələri də bu dialoqa başlamaq məcburiyyətində qalacaqlar.
İranlı ekspertin fikrincə, bu dialoqun keçirilməsi ilə müsəlmanlar arasında mövcud olan ixtilafları azaltmaq olar və İran bu dialoqla Tehran islam ictimaiyyətindən kənarda olmadığını hamıya nümayiş etdirə bilər. "İran ərəb ölkələri ilə qonşudur və onları ümumi mənafelərlə yanaşı, islam amili də birləşdirir", - deyə Əmirəhmədian bildirib.
1980-ci ildən etibarən ərəb ölkələrinin İran və İraq müharibəsində Səddam Hüseyni dəstəkləməsindən sonra bu ölkələr arasındakı münasibətlər kəskin şəkildə pisləşmişdi. 2008-ci ilin aprel ayında İran Ərəb Birliyinin Dəməşqdə keçirilən iclasında müşahidəçi qismində çıxış edib və həmin iclasda İran və ərəb dialoquna dair ideya irəli sürülüb.
"İran və ərəb dialoqunun aparılması labüddür", - deyə Əmirəhmədian bildirib.
Müəlliflə əlaqə saxlamaq üçün elektron ünvan [email protected]