İran Parlamenti Rusiya təyyarələrinin alışının qadağan olunmasını tələb edir

İran Parlamenti hökumətdən son günlərdə ölkəni şoka salan iki təyyarə qəzasından sonra Rusiya istehsalı olan köhnə sərnişin təyyarələrini almaqdan çəkinməyi xahiş edib. Trend -un Fars informasıya agentliyinə istinadən verdiyi məlumata görə, bu barədə Nəqliyyat Nazirliyinin rəsmi nümayəndəsi deyib.

Nəqliyyat nazirinin müavini Əhməd Məcidi İranın nəqliyyat naziri Həmid Behbahaninin parlamentarilərlə görüşünə əsaslanaraq deyib: "Görüş zamanı parlament üzvləri təkrar etdilər ki, hökumət Rusiya təyyarələrinin yeni modelini ala bilər. Bir şərtlə ki, onlar yüksək kriteriyalara və təhlükəsizlik standartlarına cavab versinlər".

Görüş zamanı parlament üzvləri təyyarələrin standartlara uyğunluğunun diqqətlə yoxlanılmasının, yaxşı və peşəkarlığı yüksək olan mütəxəssislərin cəlb olunmasının, eləcə də köhnə təyyarələrin alınmasından çəkinməyin vacibliyini vurğulayıblar.

Görüşdə İranın Vətəndaş Aviasiyası Təşkilatının rəsmi nümayəndələri və nəqliyyat naziri parlamentarilərə İranda baş verən və 184 nəfərin ölümünə səbəb olan iki aviaqəza barədə hesabat təqdim ediblər.

İranda son iki həftə ərzində iki təyyarə qəzası baş verib. İlk iri aviaqəza iyulun 15-də Tehran-Yerevan marşrutunu həyata keçirən Tu-154M təyyarəsinin havaya qalxmasından bir neçə dəqiqə sonra olmuşdu. Qəza nəticəsində təyyarədə olan 168 nəfərin hamısı həyatını itirmişdi.

On gün sonra İranın şimal-şərqində, Məşhəd şəhərində "Avia Air" aviaşirkətinin təyyarəsinin qəza enişi nəticəsində 16 nəfər həlak olmuş, 21 nəfər yaralanmışdı.