Azərbaycan, Bakı, 18 sentyabr /Trend, müxbirlər E.Tariverdiyeva, D.Xatınoğlu/
Rəsmi Vaşinqton ümid edir ki, İran Prezidenti Həsən Ruhani beynəlxalq birliyin narahatlığını aradan qaldırmaq üçün nüvə problemi ilə bağlı əməkdaşlığa ciddi yanaşacaq. Bu barədə çərşənbə günü Trend-ə açıqlamasında ABŞ Dövlət Departamentinin nümayəndəsi Alan Eyr bildirib.
Onun sözlərinə görə, ABŞ qarşılıqlı hörmət əsasında İranın nüvə probleminin dinc yolla həll edilməsi üçün Ruhani administrasiyası ilə əməkdaşlıq etməyə hazırdır: "Əgər İran beynəlxalq birliklə nüvə problemi üzrə əməkdaşlığa başlasa, İrana qarşı yönəlmiş beynəlxalq sanksiyalar tədricən zəifləyəcək".
A.Eyr əlavə edib ki, sanksiyalar hədəf deyil, vasitədir.
Qərbin sanksiyalarından sonra İranın hazırkı iqtisadi problemlərini şərh edən Departament rəsmisi bildirib ki, İran iqtisadiyyatı dünya iqtisadiyyatı ilə yenidən birləşərsə ölkənin iqtisadi problemləri həll oluna bilər.
O, həmçinin vurğulayıb ki, İrana qarşı sanksiyalar ölkəni öz nüvə proqramı ilə bağlı planlarını dəyişməyə məcbur etmək məqsədi ilə tətbiq olunub.
Qeyd edək ki, İran Qərb tərəfindən ölkənin neft və bank sektoruna qarşı tətbiq edilən sanksiyalara görə ciddi iqtisadi problemlər yaşayır.
Suriya münaqişəsi
Rəsmi Tehranın avqustun 21-dəki hücumlardan doqquz ay əvvəl Suriyada üsyançılar tərəfindən kimyəvi silah qaçaqmalçılığı haqqında ABŞ-ı məlumatlandırmasına dair İranın bəyanatı ilə bağlı suala gəldikdə isə Eyr bildirib ki, Dəməşq ətrafında kimyəvi silahın tətbiqi ilə hücumlara görə Suriya rejiminin məsuliyyət daşıdığını sübut edən sənədlər mövcuddur: "Bu fakt öz təsdiqini tapıb".
Mətbuata sızan diplomatik yazışmalara əsasən, İran 2012-ci ilin iyulundan etibarən sünni üsyançı dəstələrin döyüşçülərinin kimyəvi silah əldə etməsi barədə Vaşinqtona xəbərdarlıq edib və ABŞ-ı üsyançı qruplara "təcili və ciddi xəbərdarlıq" etməyə çağırıb.
İranın xarici işlər naziri Məhəmməd Cavad Zərif təsdiqləyib ki, ötən ilin dekabrında İran ABŞ-ın bu ölkədə maraqlarını təmsil edən Tehrandakı İsveçrə səfirliyi vasitəsilə ABŞ-a rəsmi sənəd göndərib. Bu sənəddə rəsmi Vaşinqton zarin qazı da daxil olmaqla Suriyaya əldəqayırma kimyəvi silahların çatdırılması barədə məlumatlandırılıb.
ABŞ, Böyük Britaniya və Fransa Bəşşar Əsədi ittiham edərək bəyan ediblər ki, avqustun 21-də baş vermiş hücumlara görə məhz Suriya Prezidenti məsuliyyət daşıyır.
