Bakı. Trend:
Rusiya ABŞ tərəfindən Asiya-Sakit Okean İqtisadi Əməkdaşlıq forumunun (APEC) sammitində iştirak üçün rəsmi dəvət almayıb.
Trend xəbər verir ki, bu barədə Rusiyanın ABŞ-dəki səfiri Anatoli Antonov səfirliyin "Telegram" kanalında yazıb.
Rusiyanın Vaşinqton tərəfindən hələ də rəsmi dəvət almadığını deyən səfir, Ağ Evi bu platformanın fəaliyyətini siyasiləşdirməməyə və bütün nümayəndə heyətləri üçün bərabər imkanlar yaratmağa çağırıb.
Qeyd edək ki, Asiya-Sakit Okean İqtisadi Əməkdaşlıq forumunun sammiti bu ilin noyabr ayında ABŞ-nin Kaliforniya ştatının San-Fransisko şəhərində keçiriləcək.