Beynəlxalq Muğam Mərkəzində Nəsimi axşamı (FOTO)

Bakı. Trend:

Beynəlxalq Muğam Mərkəzində “Qəzəllər” layihəsi çərçivəsində, böyük Azərbaycan şairi və mütəfəkkiri İmadəddin Nəsiminin qəzəlləri mövzusunda musiqili gecə keçirilib.

Beynəlxalq Muğam Mərkəzindən Trend-ə verilən məlumata görə, tədbirin əvvəlində Milli Məclisin Mədəniyyət Komitəsinin sədri, Azərbaycan Milli Ədəbiyyat Muzeyinin direktoru, akademik Rafael Hüseynov çıxış edib.

R.Hüseynov Azərbaycan Prezidentinin 2019-cu ili "Nəsimi ili" elan etməsinin Azərbaycan mədəniyyəti, azərbaycan ədəbiyyatı üçün çox müstəsna əhəmiyyəti olan bir sənəd kimi qiymətləndirib:

"1920-30-cu illərdə Bakıda vaxtaşırı olaraq Şərq gecələri, Şərq konsertləri təşkil edilərmiş və indi köhnə illərin yadigarı olan afişalara baxarkən həmin axşamları ən seçkin sənətkarların ifalarının bəzəriyinə şahid kəsilirsən. Asta-asta bu xoş ənənənin də bərpası səmtində işlər görülür.
Bu axşam Muğam Mərkəzində bir ilkə imza atıldı.Yalnız Nəsimi qəzəllərindən ibarət muğamlar səsləndi. Cavan xanəndələrimiz Ehtiram Hüseynov, Babək Niftəliyev və Səbuhi İbayevin ifalarından öncə isə mən İmadəddin Nəsimi haqqında düşüncələrimi bölüşdüm".

Gecədə Beynəlxalq Muğam Mərkəzinin solistləri, əməkdar artistlər Səbuhi İbayev Ehtiram Hüseynov və Babək Niftəliyevin ifasında “Zabul segah” dəstgahı səslənib.

Xanəndələri Beynəlxalq Muğam Mərkəzinin solistləri, tarda Rövşən Qurbanov, kamançada Ceyhun Muradov, qanunda Əməkdar artist Təranə Əliyeva, balabanda Rəfael Əsgərzadə, udda Vasif Yusifli, nağarada Amil Mustafayev müşayiət ediblər.

Gecə çox böyük maraqla qarşılanıb və tamaşaçılar tərəfindən dəfələrlə alqışlanıb.

Beynəlxalq Muğam Mərkəzi nəsimi poeziyasına həsr olunmuş digər tədbirlər də hazırlayır. Beynəlxalq Muğam Mərkəzinin “Dəyirmi masa” layihəsi çərçivəsində seminar keçirilməsi də bu tədbirlərdən biri kimi nəzərdə tutulur.

Qeyd edək ki, Beynəlxalq Muğam Mərkəzi elmi tədqiqat xarakterli bir sıra layihələr həyata keçirir ki “Qəzəllər” layihəsi də onlardan biridir. İndiyə qədər “Qəzəllər” layihəsi çərçivəsində Əliağa Vahidin, Seyid Əzim Şirvaninin və digər klassik şairlərimizin poeziya nümunələrinə həsr olunmuş tədbirlər keçirib.

Konsertin informasiya dəstəyi - AZƏRTAC, ASAN radio, Trend.az, Day.az.