...

“Azərxalça”nın İsmayıllıda daha bir filialı fəaliyyətə başlayıb (FOTO)

Mədəniyyət Materials 29 Avqust 2019 12:05 (UTC +04:00)
Ötən ilin sonlarında İsmayıllıda "Azərxalça"nın yeni filial binasının tikintisinə başlanılıb və tikinti-quraşdırma işləri qısa müddət ərzində başa çatdırılıb.
“Azərxalça”nın İsmayıllıda daha bir filialı fəaliyyətə başlayıb (FOTO)

Bakı. Trend:

Dövlət başçısının 27 avqust 2018-ci il tarixli Sərəncamı ilə İsmayıllı rayonunda yeni xalça istehsalı emalatxanasının tikintisi, avadanlıq və dəzgahlarla təchizatı və infrastrukturunun yaradılması məqsədilə Azərbaycan Respublikasının 2018-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan "Azərxalça" Açıq Səhmdar Cəmiyyətinə (ASC) vəsait ayrılıb.

ASC-dən Trend-ə verilən məlumata görə, ötən ilin sonlarında İsmayıllıda "Azərxalça"nın yeni filial binasının tikintisinə başlanılıb və tikinti-quraşdırma işləri qısa müddət ərzində başa çatdırılıb. Artıq filial fəaliyyətə başlayıb.

Qeyd edək ki, respublikamızın bölgələrində xalça istehsalı emalatxanalarının yaradılmasına paralel olaraq, kadr hazırlığına da ciddi diqqət yetirilir. Toxucu kadrların hazırlanması üçün "Azərxalça" Açıq Səhmdar Cəmiyyəti filialların yaradıldığı şəhər və rayonlarda tədris-hazırlıq kursları təşkil edir. Tədris-hazırlıq kurslarını bitirənlər sertifikat alaraq Cəmiyyətin filiallarında işlə təmin edilirlər. İsmayıllıda yaradılan yeni xalça istehsalı emalatxanası üçün də tədris-hazırlıq kursu təşkil olunub. Kursa 150 nəfərdən çox toxucu cəlb edilib. İlkin mərhələdə onlardan 50 nəfəri işə götürülüb.

Filialın direktoru Dilşad Hüseynova deyir ki, İsmayıllı Azərbaycanın tarixi xalçaçılıq mərkəzlərindən biridir. Şirvan bölgəsində xalçaçılıq sənəti tarixən inkişaf edib. Zəngin boyaq bitkiləri Şirvanda xalçaçılığın inkişafına müsbət təsir göstərib. Şirvanda toxunan xalçalar orijinal bədii tərtibatı, rəng seçimi ilə yadda qalıb. İsmayıllıda fəaliyyətə başlayan bu filialda fəaliyyət göstərən toxucular bu ənənələri davam etdirəcək, unudulmaqda olan qədim çeşnilərimizi toxuyaraq xalçaçılığın yaşadılmasına öz töhfələrini verəcəklər.

Filialda işləyən toxucuların əksəriyyəti İsmayıllı şəhərinin və Qalacıq kəndinin sakinləridir.

Toxucu Çiçək Paşayeva onlar üçün yaradılan şəraitdən razılıqla danışır: “Bizim rayonumuzda iki xalça istehsalı emalatxanasının yaradılması dövlət başçısının İsmayıllı toxucularına göstərdiyi böyük diqqət və qayğının nəticəsidir. Toxucular üçün burada yüksək iş şəraiti yaradılıb. Biz işıqlı emalatxana binasında çalışır, qədim sənətimiz olan xalçaçılığı yaşadırıq. Bizə göstərdiyi qayğıya görə ölkə başçısına dərin minnətdarlığımızı bildiririk”.

Yüksək keyfiyyətlə inşa olunan filial binasında emalatxana, yeməkxana, tibb otağı, konfrans zalı, inzibati otaqlar işçilərin istifadəsinə verilib. Burada qonaq otağı da yaradılıb.

Binada təhlükəsizlik tədbirlərinin də ən müasir tələblər səviyyəsində həyata keçirilməsi nəzərə alınıb, videonəzarət sistemi quraşdırılıb. Binanın həyətində geniş abadlıq işləri aparılıb, yaşıllıqlar salınıb.

Xatırladaq ki, İsmayıllı rayonunda “Azərxalça”nın ilk filialı 2017-ci ildə fəaliyyətə başlayıb.

Məqalədə:
Xəbər lenti

Xəbər lenti