İlk xəbər saat 13:00-da yayılıb
Bakı. Ceyhun Ələkbərov - Trend:
Ölkə ərazisində yaşıllıqları artırmaq məqsədi ilə Ekologiya və Təbii Sərvətlər Nazirliyinin (ETSN) “Ağac əkək, qoruyaq, bu ənənəni yaşadaq!” devizi altında ağacəkmə aksiyasına Nərimanov rayonunda yerləşən 69 saylı körpələr evi - uşaq bağçası və 36 saylı məktəb də qoşulub.
Trend-in məlumatına görə, bağça müdiri Sona Məmmədova deyib ki, rəhbərlik etdiyi müəssisənin heyəti könüllü olaraq bu aksiyaya qoşulub:
“Ağaclar atmosferin çirklənməsinin qarşısını alan ən etibarlı müdafiə vasitəsidir, bizlər də ağac əkməklə ekologiyaya öz töhfəmizi veririk. Aksiyaya qoşulmaqda məqsədimiz atmosferi oksigenlə zənginləşdirmək, ətraf mühiti qorumaq və balacaların diqqətini yaşıllıqların qorunmasına cəlb etməkdir”.
S.Məmmədova bildirib ki, aksiya çərçivəsində valideynlər və 25 uşağın iştirakı ilə 50-dən çox müxtəlif cinsli ağac əkilib.
Nərimanov rayonu 36 saylı məktəbdə də aksiya çərçivəsində şagird və müəllimlərin iştirakı ilə 60-dan artıq ağac əkilib. Məktəbin direktoru Emilya Səfərova bildirib ki, bu cür aksiyalara uşaqları cəlb etmək onların təfəkkürünü müsbət mənada dəyişir. “ETSN-nin “Ağac əkək, qoruyaq, bu ənənəni yaşadaq!” aksiyasında iştirak etdiyimizə görə qürur duyuruq. Uşaqlar məktəbin həyətində əkdikləri ağacları ən azı 11 il özləri qoruyacaqlar”.
Ağacəkmə aksiyasında Nərimanov rayon İcra Hakimiyyətinin məsul şəxsləri, ETSN-nin əməkdaşları, KİV nümayəndələri də iştirak edib.
Qeyd edək ki, əkilən ağac tingləri Ekologiya və Təbii Sərvətlər Nazirliyi Azəryaşlandşaft ASC-nin tinglik sahəsində yetişdirilib.
