Azərbaycan, Gəncə, 15 yanvar / Trend , mцxbиr V.Məmmədov/ Azərbaycanın qərbində yerləşən Gəncədə (paytaxt Bakıdan 365 kilometr məsafədə) Kəlbəcərdən olan məcburi köçkünlər cümə axşamı etiraz aksiyası keçirərək, avtomobil yolunu bir saat bağlayıblar.
Gəncənin Gülüstan qəsəbəsində, Azərbaycan Kənd Təsərrüfatı Akademiyasının Təcrübə stansiyası deyilən ərazidə 100-ə yaxın məcburi köçkünün iştirak etdiyi aksiyanın məqsədi onların yeni tikililər aparmaq üçün qanunsuz olaraq tökdükləri tikinti materiallarının təmizlənməsinə mane olmaq olub, -cümə axşamı Trend -un bölgə müxbiri məlumat verib.
Etirazlara baxmayaraq, polisin köməyi ilə qanunsuz tikili aparmaq üçün tökülən materiallar təmizlənib və aksiyaçılar dağıdılıb.
Akademiyanın elm və texnika üzrə prorektoru Xaliq Qurbanovun cümə axşamı Trend -a verdiyi məlumata görə, institutun Gülüstan qəsəbəsində 300 hektara yaxın təcrübə sahəsi var idi. Kəlbəcərdən olan məcburi köçkünlər ərazinin 240 hektarını tutaraq orada evlər tikiblər.
Bir neçə gün bundan əvvəl isə, yerdə qalan 60 hektar ərazidə də tikili aparmaq üçün təcrübə sahələrinə tikinti materialları tökməyə başlayıblar.
"Orada cəmi 60 hektar sahəmiz qalıb ki, tələbələr orada təcrübi məşğələlər keçirlər. Tikinti işləri aparılsa, təcrübə məşğələləri üçün heç bir yer qallmayacaq", - prorektor əlavə edib.
Məqalə müəllifi ilə əlaqə ünvanı: [email protected]
