Azərbaycan, Bakı, 10 iyul /Trend/
Yardımlı rayonunda idarəetməni itirən avtomobil evə çırpılıb.
Fövqəladə Hallar Nazirliyindən Trend-ə bildiriblər ki, Yardımlı rayonu, Bozayran kəndində (rayon mərkəzindən 8 km aralı) yol-qəza hadisəsi nəticəsində "Niva" markalı minik avtomobili idarəetməni itirərək yolun kənarındakı evə çırpılıb.
Nəticədə "Niva" markalı avtomobilin yanar hissələri və vətəndaşa məxsus ümumi sahəsi 55 kv.m olan bir mərtəbəli, 3 otaqlı evin dam örtüyünün yanar konstruksiyaları yanıb.
Qəza nəticəsində avtomobilin sürücüsü 1980-ci il təvəllüdlü Ə.İ.Quliyev və avtomobildə olan sərnişin 1973-cü il təvəllüdlü İ.İ.Quliyev aldıqları ağır bədən xəsarətlərindən hadisə yerində vəfat ediblər.
Digər sərnişin 2004-cü il təvəllüdlü Quliyev Ayxan Rizvan oğlu ağır bədən xəsarətləri ilə xilasedicilər tərəfindən avtomobildən çıxarılaraq təcili yardım xidmətinə təhvil verilib.