Azərbaycan, Bakı, 12 dekabr /Trend/
Axşam saatlarında Şah İsmayıl Xətai prospektində 3 avtomobilin toqquşması ilə nəticələnən zəncirvari qəza baş verib. Bu barədə Trend Kəpəz TV-yə istinadən məlumat verir.
Göygöl sakini Məmməd İsmayılovun idarə etdiyi VAZ 2107 markalı avtomobillə Samux sakini Museyib Hüseynovun idarə etdiyi Vaz 2107 markalı avtomobil toqquşub.
Bu zaman avtomobillərdən biri sürüşərək hərəkətdə olan Ukrayna vətəndaşı Demyanenko Valentin Yuliyeviçin idarə etdiyi "BMV" markalı avtomobilə dəyib.
Nəticədə VAZ 2107-də olan sərnişinlər Elmin Həsənov və Tahirə Süleymanova, eləcə də digər avtomobildəki Orxan Mehdiyev və Emin Nağıyev yaralanaraq xəstəxanaya yerləşdiriliblər.
Həkimlər xəstələrin səhhətinin kafi olduğunu bildiriblər.
Faktla bağlı araşdırma aparılır.