Azərbaycan, Bakı, 1 dekabr /Trend, müxbir Təmkin Cəfərov/
İranın Məşhəd şəhərində 24 yaşlı ana 7 uşaq dünyaya gətirib. Bu barədə Trend İran televiziyasının rəsmi xəbər saytı iribnews-a istinadən məlumat verir.
Məlumata əsasən, Neda Aləmi evdar xanımdır. O, ikinci doğuşu zamanı 7 uşaq dünyaya gətirib. Onlardan ikisi oğlan, beşi isə qızdır. Oğlanlardan biri doğuş zamanı ölüb.
Uşaqların doğulduğu xəstəxananın baş həkimi Fatimə Tara deyib ki, 5 uşağın ümumi vəziyyəti yaxşıdır, lakin qız uşaqlarından birinin problemi var. Uşaqların çəkisi 720-940 qramdır və onların yaşama şansının 70-80 faiz olduğu bildirilir.
Aləmilər ailəsi kirayədə yaşayır. Ailənin başçısı fəhlədir. Onlar körpələrin ehtiyacını təmin etmək üçün dövlətdən yardım istəyiblər.
