Rusiya, Moskva, 04 dekabr / Trend , müxbir R.Ağayev/ Rusiya Azərbaycanın ərazi bütövlüyü prinsipini gözləmək niyyətində qətidir, - Səmərəli Siyasət Fondunun Baş direktoru Kirill Tanayev Trend -a deyib.
Onun fikrincə, Azərbaycan, Ermənistan və Rusiya prezidentlərinin Moskva Bəyannaməsinin Gürcüstandakı avqust hadisələrindən sonra imzalanması göstərir ki, Rusiyanın ərazi bütövlüyü məsələsi ilə bağlı mövqeyi sürüşkən deyil, ardıcıl və tamamilə aydındır.
Tanayev hesab edir ki, 2008 - ci ilin avqust hadisələrindən danışarkən, onların prinsipial özəlliyini unudurlar: Rusiya vətəndaşlarına qarşı silahlı təcavüz edilib, onları qətlə yetiriblər. "Gürcü hərbçiləri, ilk növbədə, rus sülhməramlılarını öldürməyə, sonra Cənubi Osetiyada yaşayan insanlara, Rusiya vətənlaşlarına qarşı addımlar atmağa başlayıblar", - SSF-nin Baş direktoru bildirib.
Onun sözlərinə görə, Rusiyanın Moldova və Dnestryanı tərəflə oradakı böhranla əlaqədar danışıqları intensivləşdirməsi və son 14 ildə ilk dəfə Qarabağla bağlı hansısa sənədin imzalanması təsadüfi deyil.
"Mən Moskvada imzalanan sənədi və danışıqlar masası arxasında oturub, hansısa sənədlə bağlı razılaşan Əliyevlə Sərkisyanın cəsarətini yüksək qiymətləndirirəm. Aydındır ki, nizamlanmanın çox tezliklə baş tutacacağını gözləməyə dəyməz, çünki Qarabağ tipli münaqişələr sürətlə başlayır, həlli uzun vaxt tələb edir", - Tanayev bildirib.
Politoloq əmindir ki, Rusiyanı bu məsələ ilə bağlı mövqeyi aydındır. Onun fikrincə, bununla ölkə nümayiş etdirir ki, postsovet məkanına real fəaliyyətilə münaqişələrin həllinə yardımçı olan səmərəverici sülhməramlı kimi qayıtmaq niyyətindədir. Tanayevin sözlərinə görə, hazırda Qarabağla bağlı sülh nizamlanmasının dalana dirənməsi və Minsk Qrupunun bütün cəhdlərinin tamamilə səmərəsiz qalması təsadüfi deyil.
"Nə üçün Qərbdə Abxaziya, Cənubi Osetiya, Dnestryanı münaqişələrlə intensiv məşğul olduqları halda, Dağlıq Qarabağla bağlı nə ATƏT-in, nə də başqa ölkələrin fəal rolun müşahidə etmirik? Çünki bu məsələ, həqiqətən, çox mürəkkəbdir. Burada yüngül həll yoxdur, burada belə şey yoxdur ki, məsələn, biz Dnestrayanı əhaləsini "sındıracağıq", onlar Moldovaya geri qayıdacaqlar və məsələ həll olunacaq. Yox, bu daha mürəkkəb məsələdir, ona görə də, bu məsələdə Rusiyanın mövqeyi ardıcıldır", - Tanayev qeyd edib.
Fransa prezidenti Nikolya Sarkozinin Azərbaycan prezideni İlham Əliyevə yazdığı məktubda Qarabağ münaqişəsinin həlli üçün 2009 - cu ilin "əhəmiyyətli" olduğu bildirilib. Bu barədə sualı cavablandıran Tanayev deyib ki, prezident Sarkozinin "əhəmiyyətli il" dedikdə nəyi nəzərdə tutduğunu söyləməyə çətinlik çəkir. Politoloqun fikrincə, münaqişənin həlli üçün istənilən il əhəmiyyətli ola bilər, çünki "hətta hansısa hadisə bir neçə il sonra baş verirsə belə, ona səbəb olan əvvəlki prosesi həlledici hesab etmək olar".
"Avropa diplomatiyası, xüsusən də Sarkozi, Fransanın erməni tərəfinə müəyyən təsirini nəzərə almaqla, bəzi diplomatik cəhdlər etməyə çalışır ", - Səmərəli Siyasət Fondunun Baş direktoru vurğulayıb.
Tanayev Qarabağ münaqişəsinin hərbi yolla həllinin tamamilə perspektivsiz olduğundan əmindir. "Mən bilirəm ki, Azərbaycanda 90 - cı illərin əvvəllərindəki məğlubiyyətin ağrısını xatırlamayan bütöv bir nəsil yetişib. Fikrimcə, Azərbaycanın son illər əldə etdiyi iqtisadi uğurlarla tərbiyə olunmuş və bununla haqlı olaraq qürurlanan həmin nəsil müharibənin və itkilərin ağrısını düzgün qiymətləndirə bilmir. Amma aydın şəkildə anlamaq lazımdır ki, iqtisadi uğurlar heç də həmişə hərbi qüdrətdə birbaşa əksini tapa bilmir ", - politoloq söyləyib.
Tanayev silahlı qarşıdurmaların və hərbi əməliyyatların başlanmasının problemin həllini tezləşdirəcəyini düşünmür. Amma onun sözlərinə görə, unutmaq lazım deyil ki, mahiyyətcə hərbi əməliyyatlar başa çatmayıb və onlar bir gündə qurtarmır. "Mən Azərbaycan rəhbərliyinin hərbi ritorikadan nə üçün istifadə etdiyini anlayıram, bu, müəyyən xarici və daxili siyasi mülahizələrlə və erməni tərəfinin də bu məsələdə xüsusi siyasi nəzakətlə fərqlənməməsi ilə bağlıdır. Amma mən qəti bu mövqedəyəm ki, konflikt hərbi yolla həll oluna bilməz", -Səmərəli Siyasət Fondunun Baş direktoru Tanayev vurğulayıb.
Müəlliflə əlaqə ünvanı: [email protected]