...

Politoloq: Ukrayna Dağlıq Qarabağ münaqişəsinin tənzimlənməsində effekt yaratmaqla özünü yeni münaqişə mərkəzinə çevirməkdən sığortalaya bilər

Ermənistan-Azərbaycan münaqişəsi Materials 4 Sentyabr 2013 12:39 (UTC +04:00)
Ukrayna regional münaqişələrdən ən çox əziyyət çəkən dövlətlərdən biridir. Dnestryanı münaqişə həm də Ukraynanın münaqişəsi hesab edilməlidir. Eyni zamanda Ukrayna etnokonfessional münaqişələrin yaranması üçün potensial namizəddir.
Politoloq: Ukrayna Dağlıq Qarabağ münaqişəsinin tənzimlənməsində effekt yaratmaqla özünü yeni münaqişə mərkəzinə çevirməkdən sığortalaya bilər

Azərbaycan, Bakı, 4 sentyabr /Trend, müxbir E.Mehdiyev/

Ukrayna regional münaqişələrdən ən çox əziyyət çəkən dövlətlərdən biridir. Dnestryanı münaqişə həm də Ukraynanın münaqişəsi hesab edilməlidir. Eyni zamanda Ukrayna etnokonfessional münaqişələrin yaranması üçün potensial namizəddir.

Trend-in məlumatına görə, bu barədə Siyasi İnnovasiya və Texnoilogiyalar Mərkəzinin direktoru, politoloq Mübariz Əhmədoğlu bu gün keçirdiyi mətbuat konfransında deyib.

M.Əhmədoğlu deyib ki, Ukraynanın Avropa İttifaqına (Aİ) inteqrasiyanı strateji prioritet hesab etməsi Rusiya tərəfdən təkcə iqtisadi təzyiqlərlə məhdudlaşmayacaqdır: "Böyük ehtimalla Zaporojye rusinləri məsələsi yenidən aktivləşdiriləcək. MDB məkanında etnik münaqişələrin sayı 4-dən 5-ə arta bilər. Buna baxmayaraq, Ukrayna MDB məkanında etnik münaqişələrin sayının azalması istiqamətində mühüm işlər görə bilər. Dağlıq Qarabağ münaqişəsinin tənzimlənməsində effekt yaratmaqla Ukrayna özünü yeni münaqişə mərkəzinə çevirməkdən sığortalaya bilər. Zaporojye rusinləri münaqişəsinin qarşısının alınmasının ən yaxşı yolu Dağlıq Qarabağ münaqişəsinin həllindən keçir".

Politoloq hesab edir ki, Ukrayna ATƏT sədri kimi Minsk Qrupunun fəaliyyətini obyektiv etməklə aktivləşdirə bilər: "ATƏT MQ vasitəçiləri bu vaxta kimi tənzimlənmə ilə deyil, Qarabağ münaqişəsi regionunda müharibənin qarşısını almaqla məşğul olublar. Bu onları obyektiv vasitəçilikdən uzaqlaşdırıb, ermənipərəstliyə yaxınlaşdırır. ATƏT-in fəaliyyətdə olan sədrinin şəxsi nümayəndəsi A.Kaspşikin missiyasının və ATƏT MQ-nin mandatı ciddi dəyişiklik tələb edir. 20 ildən çoxdur ki, bu nizamnamələrə əl gəzdirilməyib. A.Kaspşikin missiyası bu zamana kimi Ermənistan-Azərbaycan, yoxsa Dağlıq Qarabağ-Azərbaycan qoşunlarının təmas xəttində monitorinq apardığını müəyyənləşdirə bilmir. Ukrayna bu dəqiqləşmələrə nail ola bilər".

M.Əhmədoğlu hesab edir ki, Ukrayna Minsk Qrupunun 11 üzvünün iştirakı ilə iclas keçirməklə həmsədrlərin müəyyən təkliflərə qərəzli yanaşmasının, ortalığa yeni ideyalar qoymamasının səbəbini müəyyənləşdirə bilər. Bununla da Minsk Qrupunun iclası həmsədrlərin fəaliyyətinə yeni stimul verə bilər;

Politoloq deyib ki, Ukrayna Dağlıq Qarabağın erməni və azərbaycanlı icmalarının dialoqunu öz ərazisində və ya dünyanın digər yerlərində təşkil edə bilər: "Dağlıq Qarabağın erməni və azərbaycanlı icmalarını müntəzəm görüşdürməklə möhkəm dialoq mexanizmi yaradıb, bu dialoq mexanizmini Dağlıq Qarabağ ərazisinə keçirmək olar. Nəticədə Dağlıq Qarabağ Ermənistanla Azərbaycan arasında iqtisadi əlaqələrin körpüsünə çevrilə bilər. Beləliklə, regionda iqtisadi əməkdaşlıq yeni mərhələsi başlaya bilər".

M.Əhmədoğlu əlavə edib ki, Ukrayna ermənilərin işğal etdiyi 7 rayondan qovulmuş azərbaycanlıların dədə-baba yurdlarını, qohum-əqrəbalarının məzarlarını ziyarət etməsini təşkil edə bilər. Vaxtilə, Azərbaycan ərazisində yaşamış ermənilər Bakıda və digər yerlərdəki erməni qəbiristanlıqlarını ziyarət etmək istəsələr, Ukrayna bunu da təşkil edə bilər.

Politoloqun fikrincə, Ukrayna ucuz qaz, regional layihələrə qoşulmaqla bağlı Azərbaycanın təkliflərini Ermənistanın qəbul etməməsi ilə ciddi məşğul ola bilər: "Ukrayna Dağlıq Qarabağ münaqişəsinin praktiki tənzimlənməsinin başlanmasına imkan verən "Böyük Sülh Sazişi"nin imzalanmasına nail ola bilər".

Məqalədə:
Xəbər lenti

Xəbər lenti