Azərbaycanın XİN rəsmisi Ermənistan müxalifətini səhvlərini etiraf etməyə çağırır

Azərbaycan, Bakı / Trend , müxbir S.Ağayeva / "Ermənistan müxalifəti Azərbaycan ərazilərini özününkü kimi tanımaqdansa, öz səhvlərini etiraf etsin və bir daha heç vaxt onları təkrarlamasın" - deyə Azərbaycan XİN-in mətbuat katibi Xəzər İbrahim çərşənbə axşamı Ermənistan müxalifətinin qondarma Dağlıq Qarabağ Respublikasının tanınması ilə bağlı qanun layihəsi hazırlamasına dair məlumatı şərh edərkən bildirib.

Müxalifətçi fraksiya bu gün Ermənistan parlamentində qondarma Dağlıq Qarabağ Respublikasının tanınması ilə bağlı qanun layihəsini müzakirəyə çıxarıb.

"İrs" partiyası fraksiyasının rəhbəri Raffi Ovanesyan parlament spikeri Tiqran Torosyana sənədlər paketini yollayıb.

iki Cənubi Qafqaz ölkəsi arasındakı münaqişə 1988-ci ilə təsadüf edir. Səbəb Ermənistanın Azərbaycana qarşı ərazi iddiası ilə çıxış etməsi olub. Azərbaycan torpaqlarının 20 faizi, konkret olaraq Dağlıq Qarabağ və 7 ətraf rayonu Ermənistan Silahlı Qüvvələrinin işğalı altındadır. 1994-ci ilin mayında tərəflər atəşkəs haqqında razılaşma əldə ediblər və bu vaxtadək ATƏT-in Minsk qrupunun vasitəçiliyi ilə hələlik sülh danışıqları aparılır.