Azərbaycan, Bakı, 1 fevral/ Trend , müxbir K.Ramazanova/ Avropa Komissiyasının Azərbaycandakı xüsusi nümayəndəsi Alan Vadamsın Trend ə eksklüziv müsahibəsi
- Bir il əvvəl Avropa İttifaqı və Azərbaycan "Avropa Qonşuluq Siyasəti" çərçivəsində Fəaliyyət planı imzalayıblar. Yaxın vaxtlarda Avropa İttifaqı Azərbaycanın götürdüyü öhdəliklərin yerinə yetirilməsi haqqında ilk məruzəsini açıqlamaq niyyətindədir. Sənəddə hansı məsələlər öz əksini tapıb?
- Hər 12 aydan bir biz Fəaliyyət planının inkişafı üzrə monitorinq və məsələ üzrə müzakirələr keçiririk. Fəaliyyət planı beş il müddətinə nəzərdə tutulub və məruzəninin əhatə edəcəyi 10 prioritet sahəni əks etdirir. Lakin bu, imtahan deyil və biz kimin nə etməli olduğu haqqında tapşırıqlar vermirik. Bu, bizim əməkdaşlıq sahələrimizi müəyyənləşdirən fəaliyyət planıdır.
- Aİ-nin Azərbaycanla viza rejimini sadələşdirməsi haqqında danışmaq nə qədər reallığa uyğundur? Bu zaman Avropanın özü üçün problem hesab etdiyi mühacirət məsələsi qalxmayacaqmı?
- Bu təkcə Azərbaycana aid deyil. Biz Avropaya mühacirətlə bağlı problemləri anlayırıq və əməli tədbirlər görməyə çalışırıq. Onlardan biri qeyri-qanuni miqrantların vətənlərinə geri qaytarılması və insan ticarəti ilə mübarizə haqqında razılaşmadır. Müzakirələr Avropa sərhədlərinin daha yaxşı idarə edilməsinə gətirəcək.
- İmzalanmış sazişə əsasən, Avropa İttifaqı Azərbaycana sonrakı üç il üçün 92 milyon dollar ayıracaq. Bu vəsaitlərin xərclənməsi necə həyata keçirilir?
- Bizim Aİ-yə bəzi üzv ölkələrdə Avropa İttfaqı ilə oxşar strukturların yaradılmasını nəzərdə tutan tvininq-layihələrimiz var və bu, təcrübə mübadiləsinə yardım edir. Bu məqsədlə hər il 30 milyon avro ayrılır. Sazişə əsasən, birinci il investisiyalar enerji sektoru və bərpa olunan enerji mənbələri, ətraf mühit sahələrinə yönəldiləcək. Növbəti il kənd təsərrüfatı investisiya sahəsi olacaq. Üçüncü il isə diqqət yurisdiksiya sahəsində islahatlara yönələcək. Biz bu layihələrin səmərəli olacağını gözləyirik.
- Aİ-yə daxil olmaq üçün danışıqların aparıldığı yeganə müsəlman ölkəsi Türkiyə hələ də Avropa İttifaqının tam hüquqlu üzvü ola bilmir. Öz vaxtında Azərbaycan da kökündə dini faktorun dayandığı müəyyən problemlərlə qarşılaşmayacaqmı?
- Azərbaycanın Avropa İttifaqına qəbul edilməsi gündəlikdə dayanmır. İslama gəldikdə isə biz stresin çox olduğu dünyada yaşayırıq. İnsanlar siyasi məsələlərə görə, fundamentalizm və ekstremizm məsələlərini böyütməyə meyllidirlər. Bu problemlər hər yerdə mövcuddur. Radikallıq problemdir və sosial-iqtisadi problemlər mövcud olan cəmiyyətlərdə yaranır. Düşünürəm ki, Azərbaycanda vəziyyət və cəmiyyət stabildir, ölkədə balanslaşdırılmış inkişaf aparılır.
- Azərbaycan və Aİ arasında danışıqların növbəti raundu nə zaman baş tutacaq?
- Aİ-nin ticarət və investisiya məsələləri üzrə Alt Komitəsi ilə danışıqlar fevralın sonunda baş tutacaq. Apreldə Komitəninin energetika, nəqliyyat və ətraf mühit üzrə iclası keçiriləcək. Komitədə Azərbaycan-Aİ əməkdaşlığı üzrə görüşlər iyun-iyulda baş tutacaq. Əməkdaşlıq üzrə Şuranın iclası noyabrda keçiriləcək.