Bakı. Trend:
Tələbə kreditlərindən istifadə edən tələbələrin 54%-i qadınlardır.
Trend xəbər verir ki, bu sözləri elm və təhsil nazirinin müavini İdris İsayev "Azərbaycanın dayanıqlı inkişafı naminə təhsilə investisiya" mövzusunda 7-ci Dayanıqlı İnkişaf Məqsədləri Dialoqu çərçivəsində təşkil edilən panel müzakirə zamanı deyib.
O bildirib ki, 2021-ci ildə təhsil alanların yarısı dövlət hesabına, yarısı isə ödənişli təhsil alıb:
"Ödənişli təhsil alan tələbələr arasında müxtəlif imkanların yaradılması önəmli məsələdir. Bu məqsədlə Tehsil Tələbə Krediti Fondu yaradılıb. Fond vasitəsilə ödənişli təhsil alan tələbələr kreditlər əldə edərək öz təhsil haqlarını ödəyə bilirlər. Bu kreditlərdən istifadə edən tələbələrin 54%-i qadınlardır. Bu isə göstərir ki, övladlarımıza, xüsusilə də qızlarımıza təhsil sahəsində imkanlar yaratmaq istiqamətində mühüm addımlar atılıb”.