Azərbaycan, Bakı, 06 fevral / Trend , müxbir A.Qasımova, D.Bobesyuk, R.Ağayev / Ukraynanın Ümumdünya Ticarət Təşkilatına (ÜTT) üzv olması Rusiya ilə əlaqələrinə əngəl törətməyəcək.
"Ukraynanın Rusiya ilə əlaqələri inkişaf edir və gələcəkdə də bu inkişaf davam edəcək. Ukraynanın Qərbə doğru hərəkəti Rusiya ilə iqtisadi əlaqələrində əngəl törətməyəcək" - çərşənbə günü Kolumbiya Universitetinin amerikalı eksperti Linkoln Mitçell elektron poçt vasitəsi ilə Trend ə bildirib.
2008-ci il fevralın 5-də ÜTT-nin Baş Şurası Cenevrədəki iclasında Ukraynanın ÜTT-yə üzv olmasına icazə verib. Ukrayna 30 gündən sonra sənədin Ali Radada təsdiqlənməsindən sonra təşkilatın tamhüquqlu üzvü olacaq.
Ukraynalı politoloq Mixayıl Poqrebinski hesab edir ki, Ukrayna ÜTT-yə üzv olduqdan sonra Rusiyanın təşkilata üzv olmasına mane olmayacaq, lakin o müəyyən fayda əldə etmək üçün öz mövqeyindən istifadə edə bilər.
"Bu vəziyyətdə baxmayaraq ki, Ukrayna ÜTT-nin üzvüdür, Rusiya ilə ticarət şərtləri yaxşılaşmayacaq. İstisna edilmir ki, Ukrayna hökumətinin hazırkı nümayəndələri bu faktordan Rusiya ilə əlaqələrində yararlanmağa cəhd göstərəcəklər, lakin yəqin ki, onlar Rusiya ilə kompromis nəticə axtaracaqlar" - Siyasi Araşdırmalar və Konfliktologiya Mərkəzinin direktoru Mixayıl Poqrebinski Trend ə deyib.
Ukraynanın Beynəlxalq Perspektiv Araşdırmaları Mərkəzinin eksperti İldar Qazizullin Trend ə fikrini bildirərək deyib ki, Ukrayna hazırda Rusiya hökuməti ilə işləyən İşçi qrupa qoşularaq öz tələblərini irəli sürə bilər, lakin o, Rusiyanın ÜTT-yə üzv olmasını gecikdirmək üçün öz imkanlarından sui-istifadə etməyəcək.
"Mən hesab edirəm ki, Ukrayna istəsə belə, Rusiyanın ÜTT-yə üzv olmasının gecikdirilməsinə icazə verilməyəcək. Ukrayna Rusiya tərəfindən məhdudiyyətlərin olduğu boru məhsulları və ya metallyayana dair tələblərini sürə bilər. Qrupun digər üzvləri Ukraynaya imkan verməyəcəklər ki, Rusiyaya qarşı bazarlarını həddindən artıq açmasına dair tələblər irəli sürsün" - Qazizullin deyib.
Əvvəl rəsmi Kiyev dəfələrlə bildirib ki, Ukrayna Rusiyadan əvvəl ÜTT-yə üzv olsa, ona əlavə tələblər irəli sürmək niyyətində deyil.
Rusiya politoloqu Qriqori Trofimçuk əmindir ki, Ukraynanın ÜTT-yə üzv olması Rusiya ilə ikitərəfli əlaqələrinə təsir göstərəcək. "Rusiyaya qarşı RLS məsələsi mənfi həll olunur, Ukraynanın ÜTT-yə üzv olması əlavə olaraq Ukraynanı gücləndirir və o, özünü daha sərt aparacaq" - Strateji Modelləşdirmə Mərkəzinin vitse-prezidenti qeyd edib.
Trofimçukun sözlərinə görə, Ukraynanın ÜTT-yə üzv olması onu rəsmən gücləndirəcək və Ukraynaya böyük olmasa da, siyasi təsir vasitələri verəcək. "Bunun Rusiya və ÜTT-yə üzv olmayan ölkələrə qarşı olub-olmayacağı Ukraynanın gələcəkdə bu istiqamətdə görəcəyi işlərdən asılıdır" - ekspert əlavə edib.