Azərbaycan, Bakı, 04 mart / Trend , müxbir S.İlhamqızı/ Müxalifətçi Azərbaycan Kommunist Partiyasının sədrliyindən uzaqlaşdırılmış Rüstəm Şahsuvarov özünün yeni partiyasını yaradır.
"AKP-də olan tərəfdarlarımdan mənə edilən çoxsaylı müraciətlərə görə artıq yeni partiya yaratmağı düşünürəm" - deyə Şahsuvarov çərşənbə axşamı Trend ə açıqlamasında bildirib.
AKP-nin keçmiş sədri Ramiz Əhmədov ötən il vəfat etdikdən sonra partiya iki yerə - sədr müavinləri Rauf Qurbanov və Rüstəm Şahsuvarovun tərəfdarlarına bölünüb, hər iki tərəf ayrılıqda qurultaylarını keçirərək AKP adına iddia ediblər.
Bu ilin yanvarında Şahsuvarovun sədrlik etdiyi AKP-də daxili narazılıqlar yaranıb və Şahsuvarov sədrlikdən uzaqlaşdırılıb. Partiyanın bu qanadına Ələsgər Xəlilov sədr seçilib, Şahsuvarov isə bunu çevriliş adlandırıb, partiyanın və onun yeni rəhbərliyinin fəalliyyətini isə qeyri-legitim hesab edir.
Şahsuvarov ötən ay Trend ə açıqlamasında bildirmişdi ki, "Yeni Nəsil Azərbaycan Kommunistləri Partiyası" adlı yeni siyasi partiya yaradılır və orada təmsil olunmağı düşünür.
"Mən artıq bu qərara gəlmişəm ki, Yeni Nəsil Azərbaycan Kommunistləri Partiyası ilə sadəcə əməkdaşlıq edəcəm. Çünki AKP-də məni dəstəkləyən və mənimlə bir yerdə fəaliyyət göstərmək istəyən tərəfdarlarım var. Onların mənə müraciətlərindən sonra bu qərara gəlmişəm ki, tərəfdarlarımla birgə yeni partiya yaradım" - deyə Şahsuvarov bildirib.
Onun sözlərinə görə, yaradacağı partiya solçu, marksist təmayüllü partiya olacaq. Bu partiya aprelin sonu, mayın əvvəlində təsis oluna bilər.
Şahsuvarov həmçinin əlavə edib ki, digər solçu, kommunist yönümlü partiyalara birləşmək niyyətində deyil, çünki onların siyasi iflasa uğradığını düşünür.