Azərbaycan, Bakı, 22 may / Trend , müxbir E.Babayev/ Azərbaycanın solçu müxalif Sosial Demokrat Partiyası (ASDP) müxalifətin Seçki Məcəlləsi ilə bağlı keçirəcəyi ümumrespublika müşavirəsində iştirakdan imtina edib. "Bütün bunlar hamısı oyundur və biz bu müşavirədə iştirak etməyəcəyik", cümə axşamı Trend a ASDP həmsədri Araz Əlizadə bildirib.
Beş müxalifət təşkilatı (Demokrat, Müsavat, Tərəqqi, Milli İstiqlal partiyaları və Azərbaycan Naminə İctimai Forum) Seçki Məcəlləsinə əlavə və dəyişikliklərlə bağlı bütün müxalifət düşərgəsinin mövqeyini özündə əks etdirən vahid sənəd hazırlamaq barədə qərar verib. Bu məqsədlə gələn həftə ümumrespublika müşavirəsi keçiriləcək. Üç müxalifət partiyasını (Xalq Cəbhəsi, Vətəndaş və İnkişaf, Liberal) özündə birləşdirən "Azadlıq" bloku tədbirdə iştirakdan imtina edib. Blok bunu seçkini boykot etmək niyyətində olmaları ilə izah edib. Qurum hesab edir ki, bu məsələni seçkidə iştirak qərarı verən partiyalar özləri müzakirə etməlidirlər.
Əlizadə bildirib ki, Seçki Məcəlləsinə əlavə və dəyişikliklərə bu qədər vaxt sərf etməyinə dəyməz. Əsas məsələ seçkinin demokratik keçirilməsi üçün siyasi iradənin olmasıdir. Onun fikrincə, məcəlləyə dəyişikliklər partiyaların seçki ilə bağlı mövqeyini də dəyişməyəcək. "Bu dəyişikliklərdən sonra yenə də boykot mövqeyində olanlar və seçkidə iştirak qərarı verən partiyalar mövqelərini dəyişməyəcəklər" - deyə o bildirib.
ASDP sol təmayüllü müxalifət partiyasıdır. Partiyanın həmsədri Araz Əlizadə, digər həmsədri isə Azərbaycanın eks-prezidenti, hazırda mühacirətdə yaşayan Ayaz Mütəllibovdur.
1991-ci ildə Azərbaycan müstəqilliyini elan etdikdən sonra Mütəllibov ilk prezident seçilib. 1992-ci ildə Xalq Cəbhəsi Hərəkatının hakimiyyətə gəlişindən sonra ölkəni tərk edib, o vaxtdan indiyədək Rusiyada mühacirətdə yaşayır.
Eks-prezident Azərbaycanın Baş Prokurorluğunun ittihamı əsasında beynəlxalq axtarışa verilib. Mütəllibov dövlət çevrilişinə cəhd, qanunsuz silahlı dəstələrin yaradılması, zorla hakimiyyəti ələ almaq və digər ağır cinayətlər törətməkdə günahkar bilinir.
Məqalə müəllifi ilə əlaqə ünvanı: [email protected]