Azərbaycan, Bakı, 30 may/ Trend , müxbir E.Babayev/ Azərbaycanda seçki kampaniyası dövründə dövlət televiziyasına (AzTV) "Xəbərlər" proqramını yayımlamaq qadağan olunmayacaq. "Əsas tələb o olacaq ki, xəbər verilən zaman prezidentliyə namizəd olan subyektə divident gətirə biləcək fikirlər işlədilməsin və MSK bu məsələyə ciddi şəkildə nəzarət edəcək", - MSK sədri Məzahir Pənahov deyb.
Trend -un arayışı: Azərbaycanda prezident seçkisi oktyabrın 15-də keçiriləcək. Seçki Məcəlləsinə edilən əlavə və dəyişikliklərdən biri ondan ibarətdir ki, dövlət KİV-lərində seçki təbliğatının aparılması qadağan olunur. Namizədlərə pulsuz efir vaxtı bundan sonra yalnız İctimai Televiziyada ayrılacaq. Müxalifət hesab edir ki, seçki kampaniyası vaxtında AzTV-də prezidentliyə namizəd olacaq hazırki dövlət başçısı ilə bağlı materiallara geniş yer verilməsi onun tıbliğatına xidmət edəcək.
Pənahov vurğulayıb ki, dövlət televiziyasına "Xəbərlər" proqramını yayımlamaq qadağan oluna bilməz. "Dövlət televiziyasının seçkilərdən kənarlaşdırılmasının əsas səbəbi odur ki, bu qurum dövlət büdcəsindən maliyyələşir. Ancaq bu heç də o demək deyil ki, televiziya seçki vaxtı xəbərlər yayımlaya bilməz", - deyə Pənahov bildirib.
Məqalə müəllifi ilə əlaqə ünvanı: [email protected]
