Azərbaycan, Bakı, 04 iyun / Trend , müxbir D.Xatınoğlu/ İranın sabiq prezidenti Əli Əkbər Rəfsəncaninin Səudiyyə Ərəbistanında keçirilən beynəlxalq konfransda iştirak etməklə yanaşı, həm də ölkənin kralı Abdulla bin Əbdüləziz - Al Səudla görüşməsi bu səfərin daha çox siyasi xarakter daşıdığını göstərir. "İranın sabiq prezidentinin Səudiyyə Ərəbistanına dəvət olunması dini deyil, siyasi xarakter daşıyır" - deyə, Londonda fəaliyyət göstərən İran-Ərəb Tədqiqatlar Mərkəzinin sədri Əlirza Nurizadə Trend -a bildirib.
İyunun 3 - 4-də Səudiyyə Ərəbistanının Ciddə şəhərində 800 din xadiminin iştirakı ilə "İslam Məzhəbləri arasında dialoq" adlı beynəlxalq konfrans keçirilib. Rəfsəncaninin bu konfransda iştirakı Səudiyyə Ərəbistanın kralı Abdulla bin Əbdüləziz Al Səudun dəvəti ilə baş tutub. Konfrans çərçivəsində kral ilə Rəfsəncani danışıqlar aparıblar, lakin müzakirə mövzusu barədə konkret məlumat verilmir.
"Abdulla bin Əbdüləziz Al Səud hələ vəliəhd olanda Rəfsəncani ilə yaxın dost idi. Rəfsəncaninin prezidentliyi dövründə İranla Səudiyyə Ərəbistanı arasında əlaqələr daha sıx və geniş idi" - deyə, İran əsilli politoloq Nurizadə çərşənbə günü Londondan telefonla bildirib.
Onun fikrincə, Əhmədinejadın prezident seçilməsindən sonra Tehran-Ər-Riad münasibətləri gərginləşib. "Bu gərginliyə İranın Livan və İraqda sabitliyin pozulmasında fəal iştirakı, İranın nüvə proqramı və digər məsələlər səbəb olub" - deyə ekspert bildirib.
Nurizadənin fikrincə, Rəfsəncani din xadimindən daha çox, siyasi xadim kimi tanınır, ona görə də rəsmi Ər-Riad İran hakimiyyətində böyük nüfuza malik olan bu şəxsin vasitəsilə, rəsmi Tehranla danışıqlar aparmağa cəhd göstərir.
İyunun 3 - 4 - də Səudiyyə Ərəbistanının Ciddə şəhərində keçirilən konfransda əsas müzakirə mövzusu İraq və Livanda müxtəlif məzhəblərə mənsub müsəlmanlar arasında münaqişələrin aradan qaldırılması ilə bağlı olub.
Dialoq mövzusunda analoji konfranslar bundan əvvəl müxtəlif ölkələrdə, o, cümlədən Pakistanda keçirlib.
