Azərbaycan, Bakı, 09 iyun/ Tr , müxbir E.Babayev/ Azərbaycanın müxalif Böyük Quruluş Partiyası (BQP) prezident seçkisi ilə bağlı mövqeyini dəqiqləşdirib. "Partiya üzvlərinin əksəriyyəti seçkidə iştirakın tərəfdarıdır və mən özüm namizəd olmaq niyyətindəyəm", - deyə bazar ertəsi Trend -a BQP sədri, millət vəkili Fazil Qəzənfəroğlu bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partiyasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyası Qüdrət Həsənquliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Bir müddət öncə Qəzənfəroğlu bildirmişdi ki, Seçki Məcəlləsinə əlavə və dəyişikliklər zamanı müxalifətin təklifləri nəzərə alınmasa, partiya seçkidə öz namizədi ilə iştirak etməyəcək və başqa bir namizədi dəstəkləmək yolu tutacaq.
Qəzənfəroğlu vurğulayıb ki, Seçki Məçəlləsinə əlavə və dəyişikliklər sırasında onları qane etməyən məqamlar var . Ona görə də yaranmış vəziyyət partiyanın müvafiq qurumlarında geniş müzakirə olunacaq. "Şəxsən mən özüm seçkidə iştirakın tərəfdarıyam", - deyən Qəzənfəroğlu əlavə edib ki, yekun qərar bu ayın sonuna kimi veriləcək. Bunun üçün partiyanın Ali Məclisinin iclası keçiriləcək.
Müxalifətyönlü BQP 2004-cü ildə yaradılıb, 2005-ci ildə dövlət qeydiyyatına alınıb. Partiyanın sədri Fazil Qəzənfəroğlu Milli Məclisin deputatıdır.
Məqalə müəllifi ilə əlaqə ünvanı: [email protected]