Azərbaycan, Bakı, 10 iyun / Trend , müxbir C.Babayeva/ Müxalif Azərbaycan Liberal Demokrat Partiyası (ALDP) qərargahla təmin olunmadığı üçün Dövlət Əmlakının İdarə Edilməsi üzrə Dövlət Komitəsini məhkəməyə verir. Bu barədə ALDP sədri Fuad Əliyev çərşənbə axşamı Bakıda keçirilən mətbuat konfransında məlumat verib.
Trend -un arayışı: ALDP 1999-cu ildə yaradılıb və dövlət qeydiyyatına alınıb. Azərbaycanın "Siyasi partiyalar haqqında" qanununa əsasən, dövlət qeydiyyatına alınmış partiyanı dövlət imkanı daxilində qərargahla təmin etməlidir. İyunun 2-də ALDP Dövlət Əmlakının İdarə Edilməsi üzrə Dövlət Komitəsinin binası qarşısında piket keçirməyi planlaşdırırdı. Bakı Şəhər İcra Hakimiyyəti partiyanın piket keçirməsini məqsədəuyğun hesab etməyərək icazə verməyib.
Əliyevin sözlərinə görə, Xətai rayon məhkəməsi partiyanın iddiasını təmin etməsə, ALDP Avropa Məhkəməsinə müraciət edəcək. "Dövlət ALDP-ni qərargahla təmin etmirsə, "Siyasi partiyalar haqqında" qanundan dövlət qeydiyyatına alınmış partiyaların qərargahla təmin olunması barədə maddə çıxarılmalıdır", - deyə Əliyev bildirib.
Məqalə müəllifi ilə əlaqə ünvanı: [email protected]
