Azərbaycan, Bakı, 11 iyun/ Trend , müxbir C.Babayeva/ Azərbaycanın doqquz müxalifət partiyasının yaratdığı Demokratik Seçki Mərkəzinin prezident seçkisi ilə bağlı vahid mövqeyi olmayacaq. "Seçki Məcəlləsinə olunan əlavə və dəyişikliklərdən sonra, DSM-in ilk toplantısında müzakirələr nəticəsində, qurumda təmsil olunan partiyaların hamısı Məcəlləyə olunan əlavə və dəyişiklikləri mürtəce olduğu qənaətinə gəlib. Lakin buna baxmayaraq, qurumda təmsil olunan partiyalar seçki ilə bağlı fərqli mövqedədirlər", - deyə çərşənbə günü Trend -a DSM-də təmsil olunan "Azadlıq" partiyasının sədri Əhməd Oruc məlumat verib.
Trend -un arayışı: Yanvarın 30-da Azərbaycanın doqquz müxalifət partiyası - Klassik Xalq Cəbhəsi, Azadlıq, Milli-Demokrat, Böyük Quruluş, Bütöv Azərbaycan Xalq Cəbhəsi (BAXCP), Böyük Azərbaycan, Açıq Cəmiyyət, Təkamül və Yaşıllar partiyaları Demokratik Seçki Mərkəzinin (DSM) yaradılması barədə qərar qəbul edib. DSM-də təmsil olunan BAXCP-nin sədri Qüdrət Həsənquliyev və Yaşıllar partiyasının sədri Mais Güləliyev prezident seçkisində iştirak etmək barədə qərar qəbul edib.
Parlament keçən həftənin bazar ertəsi Seçki Məcəlləsinə əlavə və dəyişiklikləri qəbul edib. Yeni layihəyə görə, prezidentliyə namizədlərin depozit qoyma şərti götürülür. Namizədlər yalnız imza toplayacaqlar. Namizədliyin qeydə alınması üçün tələb olunan 45 min imzanın 40 minə endirilməsi nəzərdə tutulur. Seçki kampaniyasının müddəti 120 gündən 75 günə endirilir. Məcəllədə dövlət televiziyasında namizədlərə pulsuz efir vaxtı ayrılması qadağan edilib. Təbliğat materiallarının divarlara və obyektlərə vurulması qadağan edilib, bunun üçün xüsusi yerlər ayrılması nəzərdə tutulub. Müxalifət əlavə və dəyişikliklərdən narazı qalıb.
Orucun sözlərinə görə, DSM-də təmsil olunan partiyaların bəziləri prezident seçkisində iştiraka qərar verib, bəziləri boykot tərəfdarıdır, bəzilərinin mövqelərində qeyri-müəyyənlik qalmaqdadır. "DSM-də təmsil olunan partiyaların ümumi boykot qərarı verəcəyi də gözlənilən deyil", deyə o bildirib.
Prezident seçkisindən sonra DSM-in fəaliyyətinə gəlincə, Oruc bildirib ki, qurumun fəaliyyətinin davam etdirilməsi məsələsinə seçkidən sonra baxılacaq. "DSM-in Əsasnaməsinə əsasən, qurum yalnız prezident seçkisi ilə bağlı deyil, parlament və bələdiyyə seçkiləri zamanı da əməkdaşlıq edəcək siyasi qurumların birliyidir", deyə Oruc qeyd edib.
Orucun sözlərinə görə, o, DSM kimi qurumların ləğvinin deyil, qorunub saxlanmasının tərəfdarıdır.
Məqalə müəllifi ilə əlaqə saxlamaq üçün ünvan - trend
