Azərbaycan, Bakı, 17 iyun/ Trend müxbir C.Babayeva/ Müxalifəti təmsil edən "Bizim Azərbaycan" blokunun prezident seçkisində dəstəkləyəcəyi namizəd blok daxilində parçalanmaya səbəb olub. Blok tərəfindən prezident seçkisində "Azərbaycan Naminə" İctimai Forumun rəhbəri Eldar Namazovun namizədliyinin dəstəklənməsinə dair qərar qəbul edildiyinə görə, blokda təmsil olunan Fədailər Partiyası qurumu tərk edib. "Blokun Eldar Namazovu dəstəkləməklə bağlı mətbuatda yaydığı xəbərlər blokda təmsil olunan bütün partiyaların, o cümlədən Fədailər Partiyasının mövqeyini əks etdirmir", - deyə çərşənbə axşamı partiyanın Trend -a daxil olan bəyanatında bildirilib. Bəyanat partiyanın sədri Alim Babayev tərəfindən imzalanıb.
Trend -un arayışı: "Bizim Azərbaycan" bloku 2003-cü il keçirilən prezident seçkisi dövründə prezidentliyə namizəd olan Müsavat Partiyasının başqanı İsa Qəmbərin namizədliyini dəstəkləmək üçün yaradılmışdı. Sonradan Müsavat Partiyası bloku tərk edib. "Bizim Azərbaycan" blokunda səkkiz partiya təmsil olunurdu. Blokun Sədrlər Şurası prezident seçkisində "Azərbaycan Naminə" İctimai Forumun rəhbəri Namazovun namizədliyini dəstəkləyəcəyi barədə bəyanat qəbul edib.
Namazov 1993-1999-cu illərdə prezident köməkçisi və Prezident Katibliyinin rəhbəri olub.
Azərbaycanda prezident seçkisi oktyabrın 15-də keçiriləcək.
Məqalə müəllifi ilə əlaqə saxlamaq üçün ünvan - trend
