Türkiyə, Ankara, 18 iyun / Trend , müxbir T.Əliyev/ Türkiyənin hakim Ədalət və İnkişaf Partiyasının (AKP) bağlanması tələbi ilə Konstitusiya Məhkəməsində baxılan iddianamə ilə bağlı məhkəmə iclaslarının tarixi müəyyənləşib. Türkiyənin NTV kanalının məlumatına görə, iyulun 1-də AKP-nin bağlanması tələbi ilə çıxış edən Baş prokuror Əbdürəhman Yalçınkaya Konstitusiya Məhkəməsi qarşısında öz tələbini şifahi şəkildə əsaslandırmağa çalışacaq. İyulun 3-də keçiriləcək iclas isə hakim partiyanın nümayəndələrinin şifahi müdafiə çıxışlarına həsr ediləcək. Bundan sonra Konstitusiya Məhkəməsinin partiyanın bağlanıb-bağlanmayacağına dair qərar qəbul edəcəyi iclasın tarixi müəyyənləşəcək.
Baş prokuror AKP-ni Türkiyədə dünyəvi təməllərə qarşı yönəlmiş hərəkətlərin mənbəyinə çevrilməkdə günahlandırır. AKP isə bu ittihamı təkzib edir və iyunun 16-da partiya özünün yazılı müdafiə sənədini məhkəməyə təqdim edib.
Məqalə müəllifi ilə əlaqə saxlamaq üçün elektron ünvan [email protected]