Azərbaycan, Bakı, 07 iyul/ Trend , müxbir E.Babayev/ ABŞ-da mühacir həyatı yaşayan Azərbaycanın eks-spikeri Rəsul Quliyevin lideri olduğu Açıq Cəmiyyət Partiyasının (ACP) qarşıdan gələn prezident seçkisində iştirakı ilə bağlı son qərarı yaxın 20-25 gün ərzində veriləcək. "Mənim fikrimcə, Quliyevin Azərbaycana dönüşü baş tutmasa, onun namizədliyini irəli sürmək əhəmiyyətsizdir", - deyə bazar ertəsi Trend -a ACP liderinin müşaviri Zəminə Dünyamalıyeva bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları isə seçkidə İlham Əliyevin namiəzdliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib. Blokun Məclisində bu bəyanat müzakirəyə çıxarılıb, yekun qərar veriləcək.
Dünyamalıyevanın sözlərinə görə, ACP-nin digər müxalif partiyalardan fərqli problemləri var. Bunlardan biri və ən əsası partiyanın liderinin Azərbaycanda olmamasıdır. Digər problem isə odur ki, ACP hələ dövlət qeydiyyatına alınmayıb. "Quliyev Azərbaycana dönməsə, onun namizədliyini irəli sürüb, özümüzü aldatmağın mənası yoxdur. 2005-ci il parlament seçkilərində Rəsul müəllim namizədliyini verdi və səs qazandı. Nəticə nə oldu?", - deyən Dünyamalıyeva bildirib ki, partiya liderinin Azərbaycana dönüşü indi daha real görünür. "O baxımdan ki, bu məsələ ilə indi birbaşa Rəsul müəllim məşğul olur. Bizim seçki ilə bağlı davranışlarımız da partiya liderinin qərarına uyğun olacaq", deyə o qeyd edib.
ACP sədri Akif Şahbazov isə Trend -a bildirib ki, partiyanın yekun qərarı olmadan bu və ya digər məsələyə şərh vermək istəmir.
Sağ mərkəzçi, müxalifətyönlü ACP keçən ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Quliyevdir. Bu ilin fevralınadək ADP-nin sədri olmuş Quliyev və onun tərəfdarları etiraz olaraq ADP-dən imtina edərək özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı: [email protected]
