Azərbaycan, Bakı, 15 iyul/ Trend , müxbir E.Babayev/ Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku beynəlxalq qurumların prezident seçkilərində iştiraka çağırış qərarlarını nəzərə almayacaq. "Beynəlxalq qurumlar Azərbaycanda siyasi proseslərdə durğunluğun qalmasında maraqlıdırlar. Biz isə, boykot barədə bəyanat verərkən xalqın maraqlarını nəzərə almışıq",- bunu çərşənbə axşamı Trend -a Vətəndaş və İnkişaf Partiyasının (VİP) sədri Əli Əliyev deyib.
Trend -un arayışı: Azərbaycanda prezident seçkisinin oktyabrın 15- də keçirilməsi nəzərdə tutulur. "Azadlıq" blokunun Sədrlər Şurası may ayının sonunda seçkiləri boykot edəcəyi barədə bəyanat verib. Blokun Məclisində bu bəyanatın müzakirəyə çıxarılıb, yekun qərar verilməsi nəzərdə tutulur. Qurum ölkədə seçkiqabağı mühitdən, eləcə də seçki qanunvericiliyindən, sərbəst toplaşmaqla bağlı məhdudiyyətlərdən narazıdır. Blok hesab edir ki, Azərbaycanda demokratik seçki keçirmək üçün şərait yoxdur. Ayrı-ayrı beynəlxalq qurumlar isə, müxalifəti seçkilərdə iştirak etməyə çağırıblar və boykot taktikasını dəstəkləmədiklərini bildiriblər.
Əliyev bildirib ki, beynəlxalq qurumların bəyanatları xahiş və istək formasındadır. "Əslində, onlar da Azərbaycanda vəziyyətin necə olduğunu və bizim hansı səbəbdən boykot yolu tutduğumuzu bilirlər. Sadəcə olaraq, bəzi qurumlar Azərbaycandakı indiki vəziyyətin dəyişməməsində maraqlıdırlar. Ona görə də, müxalifətin qeyri-bərabər şəraitdə seçkidə iştirak etməsində, bu prosesdə rol almasında maraqlıdırlar" - deyə o bildirib.
VİP 2006 - cı ildə təsis olunub. Həmin vaxtadək bu partiyanın üzvləri Azərbaycan Milli İstiqlal Partiyasında (AMİP) təmsil olunublar. AMİP- də baş vermiş parçalanma nəticəsində, Əli Əliyevin tərəfdarlı öz qurultaylarını keçirərək, VİP-i təsis ediblər. VİP "Azadlıq" siyasi blokunun üzvüdür.
Məqalə müəllifi ilə əlaqə ünvanı: [email protected]
