Azərbaycan, Bakı, 04 avqust / Tr , müxbir E.Babayev/ Azərbaycanın seçkidə iştirak etməyən partiyaları yeni əməkdaşlıq formatı yarada bilər. "Müxalifətin seçkidə iştirak etməyən partiyalarının iştirakı ilə böyük güc mərkəzinin yaranması mümkündür", bazar ertəsi Trend -a müxalif Müsavat Partiyasının Mərkəzi İcra Aparatının rəhbəri Arif Hacılı bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. İyul ayında üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi Partiyası seçkiləri boykot etmək barədə yekun qərar verib. Ötən həftənin sonu hakim Yeni Azərbaycan Partiyası hazırki dövlət başçısı İlham Əliyevin prezidentliyə namizədliyini irəli sürüb. Müsavat, Vətəndaş Həmrəyliyi, Demokrat, Böyük Quruluş, partiyaları isə seçkidə öz namizədləri ilə iştirakdan imtina ediblər. Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin, Yaşıllar Partiyasının sədri Mais Güləliyevin, Liberal Demokrat Partiyasının sədri Fuad Əliyevin, Ümid Partiyasının sədri İqbal Ağazadənin namizədliyi isə təmsil olunduqları təşkilatların müvafiq qurumları tərəfindən rəsmən irəli sürülüb.
Hacılı Müsavatın müxalifətin birliyi istiqamətində danışıqlara hazır oldluğunu bildirib.
Müxalif Azərbaycan Demokrat Partiyasının (ADP) sədri Sərdar Cəlaloğlu isə bazar ertəsi Trend -a deyib ki, ölkədə yeni bir situasiya yaranıb. "Bu situasiyanı dəyərləndirib müəyyən addımlar atmalıyıq. Ancaq ilk növbədə bu vəziyyəti beynəlxalq qurumların və hakimiyyətin dəyərləndirməsi olduqca vacibdir. Onların reaksiyasını mütləq gözləməliyik. Biz adətən hansısa qərarlar veririk. Bu qərarlar ictimai rəy tərəfindən həzm edilməmiş dərhal hansısa qurumlar yaradırıq, addımlar atırıq. Nəticədə bunun effekti olmur", - deyən Cəlaloğlu birliyin yaradılmasını mümkün saysa da, tələsməməyi məsləhət görür. "Mənə elə gəlir ki, bir qədər cəmiyyətə azadlıq vermək lazımdır ki, yaranmış situasiyanı həm də xalq götür-qoy etsin ki, nə baş verir. Bundan sonra yaranmış vəziyyətə uyğun konkret addım atmaq olar. İndiki halda hamımız seçkidən imtina etmişik deyə tələsik bir yerə yığışmağa lüzum yoxdur. Bizim seçkilərlə bağlı atacağımız hər hansı düşünülməmiş addım Dağlıq Qarabağın Azərbaycandan qoparılmasına gətirib çıxara bilər. Ona görə də səbrli, təmkinli olmaq lazımdır", - deyə Cəlaloğlu əlavə edib.
Üç müxalifət partiyasının (Xalq Cəbhəsi, Liberal, Vətəndaş və İnkişaf) partiyalarının təmsil olunduğu "Azadlıq" bloku da bəyan edib ki, müxalifətin yeni birlik formatının yaranması mümkün məsələdir. Blokun üzvü, VİP sədri Əli Əliyev bildirib ki, seçkidə iştirak etməyən partiyaların işinin koordinasiyası üçün müvafiq addımların atılması mümkündür. Onun sözlərinə görə, blok seçkidə iştirakdan imtina edən partiyalarla əməkdaşlığa hazırdır. "Hansısa məsələlər ətrafında ümümi rəyə gəlmək olar", - deyə o əlavə edib.
Məqalə müəllifi ilə əlaqə ünvanı: [email protected]
