Azərbaycan, Bakı, 31 oktyabr/ Trend , müxbir A.Hüseynbala/ Azərbaycanda prezident seçkisini boykot edən müxalif partiyalarının yaratdığı Müxalifətin Əməkdaşlıq Mərkəzi Bakı şəhər İcra Hakimiyyətini məhkəməyə verib.
"Bakı şəhər İcra Hakimiyyəti Müxalifətin Əməkdaşlıq Mərkəzinin sentyabrın 28 - də nəzərdə tutduğu mitinqin keçirilməsi üçün Bibiheybət stadionunu ayırmışdı. Biz bu qərarı qanunsuz hesab edirik", - cümə günü Trend -a MƏM- ə daxil olan Müsavat Partiyası Mərkəzi İcra Aparatının rəhəbəri Arif Hacılı bildirib.
Trend - un arayışı: "Azadlıq" blokuna daxil olan partiyalar - Xalq Cəbhəsi, Liberal, Vətəndaş və İnkişaf, Müsavat partiyaları və "Azərbaycan Naminə" İctimai Forum sentyabrın əvvəllərində prezident seçkisini qanunsuz tanımaq barədə birgə bəyanat imzalayıblar. Oktyabrın 15-də keçirilən prezident seçkisindən sonra yenidən formalaşacaq hakimiyyət qeyri- legitim elan edilib.
MƏM-in oktyabrın 4 - də və 18 - də keçirmək istədiyi mitinqlər də, Bakı şəhər İcra Hakimiyyəti qurumun nəzərdə tutduğu yerlərdə icazə vermədiyi üçün, baş tutmamışdı.
Hacılı deyib ki, MƏM -in adından hazırlanan şikayət Bakının Səbayell rayon Məhkəməsinə təqdim olunub.
"Müxalifətin Əməkdaşlıq Mərkəzi Bakı şəhər İcra Hakimiyyətinə göndərilən müraciətində mitinq keçirmək üçün göstərdiyimiz yerlərin heç birinə icazə verilməyib. Məhkəməyə təqdim etdiyimiz ərizədə İcra Hakimiyyətinin həmin qərarının qanunsuz olması haqda qətnamə çıxarılmasını istəiyrik", - Müsavat funksioneri deyib.
Məqalə müəllifi ilə əlaqə ünvanı: [email protected]