İran, Tehran, 02 fevral / Trend , müxbir A.Namdari / "Xatəminin İranın növbəti prezident seçkilərində iştirakı həm Üsulgəra (fundamental) və həm də İslahatçılar düşərgəsində birlik yaradacaq", - deyə İran parlamentinin sabiq nümayəndəsi İmad Əfruğ Trend -a bildirib.
İranın sabiq prezidenti Məhəmməd Xatəmi yanvarın 31-də növbəti prezident seçkilərində namizədliyini irəli sürəcəyi ilə bağlı tərəfdarlarına dolayısıyla müsbət cavab verib. Bundan əvvəl, Xatəmi bildirmişdi ki, özü, yaxud Mir Hüseyn Musəvi (sabiq Baş nazir) namizədliyini irəli sürəcək. "Gərək Allaha təvəkkül edim və səhnəyə gəlim", - deyə Xatəmi yanvarın 31-də bildirib.
Sabiq deputat və siyasi fəall Əfruğun sözlərinə görə, Məhəmməd Xatəminin seçkilərdə namizədliyini irəli sürməsi, mühafizəkar düşərgədə vahid lider ətrafında birləşməyə səbəb olacaq, lakin Mir Hüseyn Musəvinin nəmizədliyi mühafizəkarların birliyini zəiflədəcək.
O, həmçinin əlavə edib ki, Musəvi və Xatəmi namizədliklərini prezident seçkilərində irəli sürməzlərsə, Üsulgəralar düşərgəsi gələcək prezident seçkilərində vahid lider ətrafında birləşməyib, ayrı-ayrı namizəd irəli sürəcək.
Əfruğun sözlərinə görə, İranın gələcək prezident seçkilərində konkret şəkildə kimlərin iştirak edəcəyini hazırda proqnozlaşdırmaq çətindir.
Xatəminin prezidentlik dövründə spiker müavini olmuş Məhəmməd Əli Əbtəhi bildirib ki, Xatəmi gələcək prezident seçkilərində öz namizədliyini irəli sürəcək.
"Xatəminin gələcək prezident seçkilərində iştirak etməməsi qəbul edilməzdir", - deyə Əbtəhi bazar ertəsi Los Angeles Times qəzetinə müsahibəsində bildirib.İranın islahatçı qurupları və bəzi partiyaları Xatəminin seçkilərdə iştirakını istəyir, lakin Xatəmi hələlik gələcək prezident seçkilərində iştirak edəcəyi və ya etməyəcəyi haqda rəsmi açıqlama verməyib. Xatəmi bildirib ki, o, İranın sabiq Baş naziri Mir Hüseyn Musəvinin gələcək prezident seçkilərində iştirak etməsini istəyir.
Musəvi 20 ildir ki, siyasətdən kənar, Tehranın Incəsənət Mərkəzinin sədri vəzifəsində çalışır.
İranda prezident seçkiləri 4 ildən bir keçirilir. İranda növbəti prezident seçkiləri 2009-cu ilin iyunun 11-də keçiriləcək. Prezidentliyə namizədlər sadəcə Nəzarət Şurası (Şuraye Negəhban) tərəfindən təsdiqləndikdən sonra seçki prosesinə qatıla bilərlər. Prezident seçilən şəxs Ali Dini Rəhbər tərəfindən təsdiqləndikdən sonra status əldə edir. Ali Dini Rəhbərdən sonra ikinci səlahiyyətli şəxs olan prezident bütün İcra Aparatına nəzarət edir, xarici və daxili siyasət kurslarını müəyyənləşdirir.
2005-ci ilin yayında Iran prezidenti
seçilən Əhmədinejad növbəti prezident
seçkilərində iştirakı barədə hələlik
rəsmi bəyanat verməyib.
Seçkilərdə iştirakını bəyan edən yeganə şəxs yalnız parlamentin sabiq başçısı, Milli Etimad Partiyasının lideri Mehdi Kərrubidir.
