...

Azərbaycan müxalifətinin referendumla bağlı təsis edilən təşviqat qrupu pulsuz efir vaxtının az ayrılmasına etiraz edir

Siyasət Materials 18 Fevral 2009 17:45 (UTC +04:00)

Azərbaycan, Bakı, 18 fevral / Trend , müxbir A.Hüseynbala/ Azərbaycanın müxalif partiyasının referendumla bağlı təsis etdiyi təşviqat qrupu televiziya və radioda pulsuz efir vaxtının az ayrılmasına etiraz edir.

"Bizim etirazlara baxmayaraq nə efir vaxtının həcmində, nə çıxışların efirə verilmə zamanında, nə də çıxışların formatında heç bir dəyişiklik edilməyib", - çərşənbə günü  Trend -a "Respublikaçılar" təşviqat qrupunu təsis edən Müsavat Partiyasından bildirilib.

Тrend Nеws-un arayışı: Təşviqat qrupları fevralın 18-dən etibarən təbliğat kampaniyasına start veriblər.

Mərkəzi Seçki Komissiyasının qərarı ilə həftə ərzində bir dəfə 90 dəqiqə İctimai Televiziyada, 90 dəqiqə isə İctimai Radioda efir vaxtı müəyyənləşdirilib.

Televiziyada efir vaxtı saat 18:15-dən, radioda isə saat 20:15-dən etibarən başlayacaq.

Təşviqat kampaniyası zamanı bütün təşviqat qrupları üçün həm televiziyada, həm də radioda dörd dəfə pulsuz efir vaxtı ayrılacaq.

Referendumla bağlı qəbul olunmuş təqvim planına əsasən, təbliğat kampaniyası martın 16-da saat 24:00-da başa çatdırılmalıdır.

Martın 18-də Azərbaycanda ölkə Konstitusiyasına əlavə və dəyişikliklərin edilməsi üzrə referendum keçiriləcək.

Referendum üzrə "Yeni Azərbaycan", "Şəhər", "Tərəqqi", "Hüquq və demokratiya", "Vətəndaş Cəmiyyəti", "Davamlı İnkişaf Naminə", "Zəka", "Qarabağ və Respublika Uğrunda Hərəkat" və "Respublikaçılar" təşəbbüs qrupları MSK-da təşviqat qrupları kimi qeydiyyata alınıblar. "Abad kənd", "Azad söz", "Azərbaycan Xalq Cümhuriyyəti" və "Milli İstiqlal" təşəbbüs qrupları qeydiyyatdan keçməyib.

Azərbaycan Konstitusiyası 1995-ci ildə qəbul olunub, 2002-ci ildə Əsas Qanuna dəyişikliklər edilib.

Partiyanın qəbul etdiyi bəyanatda qeyd edilir ki, bununla da hakimiyyət nümayəndələri, Mərkəzi Seçki Komissiyası, İctimai Televiziya və Radio Yayımları Şirkəti referendumla bağlı geniş ictimai diskussiyaların aparılmasında maraqlı olmadıqlarını bir daha nümayiş etdirdilər. "Referendum ərəfəsində insanların alternativ söz eşitmək, müxalifətin əhali ilə daha yaxından əlaqədə olmaq imkanlarının məhdudlaşdırılması hakimiyyətin ictimai rəydən çəkinməsinin bariz nümunəsidir", - sənəddə vurğulanır.

Müsavat Partiyası bəyan edir ki, bu faktlar Azərbaycan hökumətinin beynəlxalq təşkilatlar qarşısında azad və demokratik seçkilər keçiriləcəyi haqqında götürdüyü öhdəliklərdən boyun qaçırdığını bir daha təsdiqləyir, referendumun azad, şəffaf, ədalətli və demokratik olacağını şübhə altına salır.

Müsavat Partiyası 1911-ci ilin oktyabrında Bakıda yaradılıb. Müsavat Partiyasının (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.

Qəmbər Аzərbаycan pаrlаmеntinin еks-spikеri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Pаrtiyа 4 nəfər deputatla parlamentdə təmsil olunur. 

Məqalə müəllifi ilə əlaqə ünvanı: [email protected]

Xəbər lenti

Xəbər lenti