Azərbaycan, Bakı, 03 mart / Trend , müxbir C.Babayeva/ Azərbaycanın müxalif Müasir Müsavat Partiyasının (MMP) sədri radikal müxalifətin referendumla bağlı fikirlərinə cavab vermək məqsədilə öz hesabına ödənişli efir vaxtı almaq niyyətindədir.
Partiyanın sədri Hafiz Hacıyev, alacağı efir vaxtında radikal müxalifətin referndum üzrə "Qarabağ və Respublika Uğrunda Hərəkat" və "Respublikaçılar" təşəbbüs qruplarının təşviqat kampaniyası çərçivəsində İctimai Televiziyadakı "haqsız bəyanatlarına"cavab vermək istəyir.
"Ödənişli efir vaxtının ayrılması ilə bağlı ANS və İctimai Televiziyaya müraciət olunacaq. Prezidentliyə keçmiş namizəd kimi radikal müxalifətin əsassız fikirlərinə münasibət bildirmək istəyirəm", - çərşənbə axşamı Trend -a MMPsədri Hacıyev məlumat verib.
Trend -un arayışı: Azərbaycanda referendumla bağlı yaradılmış təşviqat qrupları fevralın 18-dən etibarən təşviqat kampaniyasına start veriblər. Referendum üzrə qəbul olunmuş təqvim planına əsasən, təşviqat kampaniyası martın 16-sı gecə saat 00:00-da bitməlidir.
Təşviqat qrupları üçün İctimai Televiziyada pulsuz efir vaxtı şənbə günü 18:15-dən 19:45-dək, İctimai radioda isə çərşənbə günü 20:15-dən 21:45-dək ayrılıb.
Seçki Məcəlləsinə əsasən, KİV-də referendum üzrə təbliğatı yalnız Mərkəzi Seçki Komissiyasında qeydiyyata alınmış təşviqat qrupları apara bilərlər.
ANS Yayım və Media Şirkəti, İctimai Televiziya və Xəzər Televiziyası referendumla bağlı ödənişli təşviqata qoşulublar.
Martın 18-də Konstitusiyanın 29-cu maddəsinə əlavə və dəyişikliklərin edilməsi məsələsi üzrə referendum keçiriləcək.
Referendum üzrə "Yeni Azərbaycan", "Şəhər", "Tərəqqi", "Hüquq və demokratiya", "Vətəndaş cəmiyyəti", "Davamlı inkişaf naminə", "Zəka", "Qarabağ və Respublika uğrunda hərəkat" və "Respublikaçılar" təşəbbüs qrupları MSK-da qeydiyyata alınıb. "Abad kənd", "Azad söz", "Azərbaycan Xalq Respublikası", "Milli müstəqillik" təşəbbüs qrupları qeydiyyatdan keçməyib.
Hacıyev bildirib ki, müraciət edəcəyi televiziya kanallarının ödənişli efir vaxtı ayırmaqları mümkün olmasa, radikal müxalifətin fikirlərinə münasibət bildirmək üçün qanunun icazə verəcəyi digər vasitələrdən istifadə edəcək.
Məqalə müəllifi ilə əlaqə ünvanı: [email protected]