...

Azərbaycanın sol təmayüllü müxalifət partiyasının bələdiyyə seçkisində iştirakı maliyyə məsələsindən asılı olacaq

Siyasət Materials 10 Aprel 2009 15:00 (UTC +04:00)

Azərbaycan, Bаkı, 10 aprel / Trend , müxbir A.Hüseynbala /

Azərbaycanın sol təmayüllü müxalif partiyasının bələdiyyə seçkisində iştirakı maliyyə problemlərinin həllindən asılı olacaq.

"Seçkidə iştirak etmək üçün kifayət qədər vəsaitimiz yoxdur. Bu səbəbdən bələdiyyə seçkisində iştirak edib-etməmək haqda qərarı hər bir rayon təşkilatı özü verəcək", - cümə günü Trend -a Azərbaycan Sosial-Demokrat Partiyasının (ASDP) həmsədri Araz Əlizadə bildirib.

Trend -un arayışı: Azərbaycanda bələdiyyə seçkilərinin 2009-cu ilin payızında keçirilməsi nəzərdə tutulur. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.

Əlizadənin sözlərinə görə, maliyyə problemini həll edə bilən hər təşkilat bələdiyyə üzvlüyünə namizədləri müəyyənləşdirməkdə sərbəst olacaq.

"Ona görə də partiyanın bütün bələdiyyələrə namizədlərini irəli sürəcəyi inandırıcı deyil", - ASDP-nin həmsədri əlavə edib.

Bələdiyyə seçkisində başqa partiyalarla əməkdaşlığa gəldikdə, Əlizadə deyib ki, ASDP heç bir siyasi qurumla müttəfiqlik etmək niyyətində deyil.

ASDP sol təmayüllü müxalifət partiyasıdır. Partiyanın həmsədri Araz Əlizadə, digər həmsədri isə Azərbaycanın eks-prezidenti, mühacirətdə yaşayan Ayaz Mütəllibovdur.

1991-ci ildə Аzərbaycan müstəqilliyini elan etdikdən sonra Mütəllibov ilk prezident seçilib. 1992-ci ildə Xalq Cəbhəsi Hərəkatının hakimiyyətə gəlişindən sonra ölkəni tərk edib, o vaxtdan indiyədək Rusiyada mühacirətdə yaşayır.

Eks-prezident Azərbaycanın Baş Prokurorluğunun ittihamı əsasında beynəlxalq axtarışa verilib. Mütəllibov dövlət çevirilişinə cəhd, qanunsuz silahlı dəstələrin yaradılması, zorla hakimiyyəti ələ almaq və digər ağır cinayətlər törətməkdə günahkar bilinir.

Məqalə müəllifi ilə əlaqə ünvanı:[email protected]

Xəbər lenti

Xəbər lenti